Lańkestik aımaqtan kelgen balalardy ońaltýmen Bilim mınıstrligi aınalysady

NUR-SULTAN. QazAqparat - Memleket lańkestik belsendilik joǵary aımaqtardan kelgen balalarǵa kepildendirilgen kómek kórsetedi. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

Sonymen qatar mınıstrliktiń lańkestik belsendilik joǵary aımaqtardan kelgen balalardy ońaltýǵa baǵyttalǵan sharalardy úılestirý jáne atalǵan sanattaǵy balalarǵa memlekettiń kepildendirilgen kómegin kórsetý úshin olardy ómirlik qıyn jaǵdaıda qalǵan tulǵalarǵa jatqyzý quzireti keńeıtiledi.

«Ózderińiz de bilesizder, «Jýsan» operatsııasy barysynda Qazaqstanǵa óte kóp bala jetkizilgen bolatyn. Olarǵa ońaltý kómegi asa qajet. Munyń barlyǵy da qarastyrylady», - dedi mınıstr Senat depýtattaryna «Pedagog mártebesi týraly» zań jobasyn tanystyrý barysynda.

«Jýsan» gýmanıtarlyq operatsııasy - aýqymdy aktsııa. Bul bastamany Tuńǵysh Prezıdent - Elbasy Nursultan Nazarbaev usyndy. 2018 jyldan beri júzege asyrylyp keledi. Sırııadan qazaqstandyqtardyń alǵashqy legi bıylǵy 6 qańtarda elge jetkizilgen bolatyn. 7-9 mamyr kúnderi atalmysh elden Qazaqstannyń taǵy 231 azamaty oraldy. Keshendi sharalar nátıjesinde qaqtyǵys aımaǵynan elimizge jalpy 357 bala qaıtaryldy. 28-31 mamyrda «Jýsan» arnaıy gýmanıtarlyq aktsııasynyń sońǵy kezeńi ótkizilgen edi.