Lamborghini 2025 jyly premıým avtokólikterdiń satylymyn rekordtyq deńgeıge jetkizdi
ASTANA. KAZINFORM — Italııalyq premıým avtokólik óndirýshisi Lamborghini 2025 jyly sportkar satylymy boıynsha tarıhı rekord ornatty. Bul týraly Reuters agenttigi jazdy.
2025 jyly kompanııa álem boıynsha 10 747 avtomobıl satty. Bul — Lamborghini kompanııasynyń búkil tarıhyndaǵy eń joǵary kórsetkish.
Óndirýshi mundaı joǵary nátıjeni gıbrıdti avtokólikterdi damytýǵa baǵyttalǵan strategııasymen, sondaı-aq barlyq aımaqtardaǵy turaqty satylym kórsetkishterimen baılanystyrady.
Satylym kólemi eń joǵary bolǵan óńir — Eýropa, Taıaý Shyǵys jáne Afrıka. Bul aımaqta 4 650 sportkar satylǵan.
Ekinshi orynda Soltústik jáne Ońtústik Amerıka — 3 347 avtomobıl.
Úshinshi orynda Azııa–Tynyq muhıty óńiri, munda 2 750 kólik ótkizilgen.
Lamborghini kompanııasynyń bas dırektory Shtefan Vınkelmannyń aıtýynsha, rekordtyq jetkizilimder brendtiń kúrdeli jahandyq jaǵdaıdyń ózinde básekelesterinen erekshelene alatynyn aıqyn kórsetedi.
Sarapshylar sondaı-aq Eýropada óndirilgen premıým jáne lıýks avtokólikterdiń satylymy turaqty túrde ósip jatqanyn atap ótti. Qymbat eýropalyq kólikterge degen suranys aıtarlyqtaı artqan, al keıbir modelder boıynsha satylym kólemi tipti shekteýler engizilgenge deıingi deńgeıden de asyp túsken.
Sonymen qatar, basqa da brendter oń dınamıka kórsetti:
Audi — satylymy 25,4%-ǵa ósip, 3 600 kólikke jetti;
Porsche — 5,7%-ǵa artyp, 2 055 birlik satty;
Lamborghini — 5,9%-ǵa ósip, 143 avtomobıl ótkizdi.
Ásirese Ferrari (75,6%-ǵa ósim, 72 kólik) jáne Rolls-Royce (62,7%-ǵa ósim, 205 kólik) kórsetkishteri erekshe kózge tústi.