«Lala» daýyly kúsheıip, Gavaıı araldaryna bet aldy
ASTANA. KAZINFORM — «Lala» daýyly Gavaııdiń Úlken aralyna tikeleı soqqy berýi múmkin. Sırek kezdesetin qubylys aralǵa baǵyt alyp keledi. Bul týraly Associated Press habarlady.
AQSh-tyń Ulttyq daýyl ortalyǵynyń (NHC) málimetinshe, «Lala» daýylynyń turaqty jel jyldamdyǵy saǵatyna 120 shaqyrymǵa deıin jetip, daýyl 1-sanatqa kóterildi. Úlken aralǵa sońǵy 155 jyl ishinde daýyl tikeleı soqqan joq. Bul joly daýyl aralǵa jetken-jetpegenine qaramastan, sınoptıkter Maýna-Kea janartaýy ornalasqan taýly aımaqtarǵa 63,5 santımetrge deıin jaýyn-shashyn túsýi múmkin ekenin eskertti.
Bul taýly óńirlerde adam ómirine qaýip tóndiretin kóshkinderge ákelýi múmkin. Ol jerde keıbir turǵyndar ortalyqtandyrylǵan kommýnaldyq jelilerden tys, ózderi salǵan úılerde turady. Bılik mundaı turǵyndardy tez arada qaýipsiz jerden baspana tabýǵa shaqyrdy.
NHC tipti daýyl kúsheıgen jaǵdaıda taýlardyń shyńdarynda, sondaı-aq jel soǵatyn jáne yq jaq betkeılerde jel jyldamdyǵy boljamda kórsetilgen jyldamdyqtan 30 paıyzǵa joǵary bolýy múmkin ekenin eskertti.
Maýı, Molokaı, Lanaı, Kahoolave, Oahý, Kaýaı jáne Nııhaý araldarynda tropıkalyq daýyl týraly eskertý jarııalandy.
Bılik turǵyndardy daýyl qaýpine baıyppen qaraýǵa shaqyrdy. Gavaıı turǵyndarynyń deni naýryzda bolǵan joıqyn sý tasqynynyń zardaptaryn joıýmen aınalysyp jatyr. Tolyq qalpyna kelip úlgermegen fermerler jańa shyǵyndarǵa alańdap otyr. Bul týraly Gavaıı fermerler bıýrosynyń dırektory Braıan Mııamoto málimdedi.
Aıta keteıik, Shyǵys Qazaqstandaǵy Maloýbınka aýylynda qatty daýyldan úıler men sharýashylyq qurylystar búlindi.
