«Lala» daýyly Gavaııge jetti: bir adam qaza taýyp, ondaǵan myń úı jaryqsyz qaldy
Birinshi sanattaǵy «Lala» daýyly Gavaııge soqqy berip, óńirde ekpini kúshti jel soǵyp, nóser jańbyr jaýdy. Dúleı tabıǵı qubylystyń saldarynan bir adam qaza taýyp, 60 myńnan astam úı elektr jaryǵynsyz qaldy. Budan bólek, 190-nan astam áýe reısi keıinge shegerilip, toqtatyldy, dep habarlaıdy Kazinform Anadolu agenttigine silteme jasap.
CNN telearnasynyń Gavaıı gýbernatory Djosh Grınge silteme jasap habarlaýynsha, tabıǵı apat saldarynan bolǵan jol-kólik oqıǵasynan bir adam qaza tapqan.
Buǵan deıin AQSh-tyń Ulttyq daýyldardy baqylaý ortalyǵy «Lala» daýylynyń birinshi sanatqa deıin kúsheıgenin habarlaǵan. Daýyl oshaǵynda jeldiń jyldamdyǵy saǵatyna 129 shaqyrymǵa deıin jetken. Sınoptıkter sý tasqyny men kóshkin qaýpi bar ekenin eskertti.
Gavaıı okrýginiń basshysy Kımo Alameda daýylǵa baılanysty eskertý áli de kúshinde ekenin aıtyp, turǵyndardy qaýipsiz jerlerge jasyrynýǵa úndedi. Onyń aıtýynsha, shtatta joldardyń jabylýy boıynsha buryn-sońdy bolmaǵan kórsetkish tirkelgen. Elektrmen jabdyqtaýdy tolyq qalpyna keltirý jumystary uzaqqa sozylýy múmkin.
Daýyl soqpas buryn Gavaııdegi sýpermarketter men janarmaı quıý beketterinde adam qarasy kóbeıip, turǵyndar qajetti zattardy jappaı satyp alǵan. Birqatar aýdanda evakýatsııalyq pýnktter ashyldy.
Qazirgi tańda 60 myńnan astam úı elektr qýatynsyz qaldy. Sonymen qatar 190-nan astam áýe reısi keshiktirilip, bir bóligi toqtatyldy.
Gavaııde keıingi ret joıqyn daýyl 1992 jyly bolǵan. Sol kezde «Inıkı» daýyly tórtinshi sanatqa deıin kúsheıip, Kaýaı aralyna aıtarlyqtaı zııan keltirgen.
Eske salaıyq, buǵan deıin «Lala» daýyly Gavaııdiń Úlken aralyna tikeleı soqqy berýi múmkin ekenin jazǵanbyz.
