Lakshminarayana Global Music Festival 2026: qazaqstandyq ónerpazdar Úndistanǵa attanady
ASTANA. KAZINFORM — 2026 jyly Úndistanda ótetin Lakshminarayana Global Music Festival aıasynda qazaqstandyq mýzykanttar Úndistannyń birqatar iri qalasynda óner kórsetedi.
Maestronyń aıtýynsha, festıval Úndistan Úkimetiniń ICCR qoldaýymen ótetin 11-shi Mýzyka jáne bı festıvaliniń ashylýymen qatar uıymdastyrylady. Bıylǵy joba burynǵy kontserttik baǵdarlamalardan aýqymy men mazmuny jaǵynan ózgeshe bolmaq.
— Biz jańa sımfonııalyq týyndylardy dál Úndistanda daıyndaýdy josparlap otyrmyz. Solardyń biri — «Navargaha» sımfonııasy. Úndi dúnıetanymynda adamnyń taǵdyryna áser etetin toǵyz ǵalamshar bar dep esepteledi, árqaısysynyń ómirge yqpaly erekshe, — dedi L.Sýbramanıam.
Sonymen qatar, festıval aıasynda 1987 jyly Úndistan men Máskeý festıvali úshin qoıylǵan «Shantı Prııa» baleti jańa formatta alǵash ret sahnalanady. Qoıylymda orkestr, hor jáne balet birlesip óner kórsetedi.
Qazaqstandyq dırıjer, maestro Abzal Mýhıtdınniń aıtýynsha, birlesken jobanyń daıyndyq jumystary 2025 jyldyń qyrkúıek aıynda bastalǵan. Alǵashqy repetıtsııalar E.Rahmadıev atyndaǵy memlekettik akademııalyq fılarmonııada ótken.
— Jobaǵa Astanamen qatar Aqtóbe, Petropavl, Kókshetaý fılarmonııasynyń mýzykanttary da qatysady. Quramynda sımfonııalyq orkestr, hor jáne balet ártisteri bar. Úndistan tarapynan solıster men urmaly aspap oryndaýshylary qosylady. Maestro Sýbramanıam skrıpkada oınap, Kavıta Krıshnamýrtı vokaldyq partııalardy oryndaıdy, — dedi ol.
Gastroldik baǵdarlama aıasynda qazaqstandyq jáne úndi ónerpazdary Delı, Kalkýtta, Chennaı, Bangalor jáne Chandıgar qalalarynda kontsert beredi. Alǵashqy kontsert Delı qalasynda ótpek.
Aıta keteıik, buǵan deıin Dımash Qudaıbergenniń kontserttik týry álemniń 13 elinde ótkeni jaıly jazǵan edik.