Lager tańdaǵanda neni eskerý kerek – sarapshy pikiri
ASTANA. KAZINFORM – Balalar lageriniń qaýipsizdigi qalaı baqylanady, tekseris kezinde qandaı talaptarǵa nazar aýdarylady? Osy jáne ózge de saýaldarǵa Astana qalasy boıynsha jazǵy demalysty uıymdastyrý sapasyn baǵalaý jónindegi monıtorıng tobynyń múshesi Kúlásh Sáttibaeva jaýap berdi.
Spıkerdiń aıtýynsha, tekserý jumystary naýryz aıynda josparlanyp, kezeń-kezeńimen júzege asqan.
– Ári qaraı keshendi sharalar jalǵasty. Onyń ishinde lager tálimgerlerine arnalǵan oqytý semınarlary uıymdastyryldy. Mamyr aıynda tekseris jumystary bastaldy. «Adal azamat – birtutas tárbıe» baǵdarlamasy aıasynda mektepterde de lagerler uıymdastyrylady. Soǵan baılanysty qujattarǵa, sanıtarlyq-epıdemıologııalyq qyzmetpen bekitilgen as mázirine jáne qaýipsizdik talaptaryna baqylaý júrgizildi, – dedi ol Jibek Joly telearnasynyń «Búgin Live» baǵdarlamasynda.
Búginde Astanada 112 lager jumys isteıdi. Tekserý barysynda birqatar nysanda kemshilikter anyqtalǵanymen, olardyń basym bóligi der kezinde túzetilgen.
– Kemshilikteri túzeldi. Alaıda aldaǵy ýaqytta óreskel qaýip pen zań buzý anyqtalsa, olardyń qyzmeti toqtatylady, – dedi Kúlásh Sáttibaeva.
Mamannyń sózinshe, lager tańdaǵanda ata-analar onyń barlyq qajetti tekseristen ótkenine kóz jetkizýi tıis. Qajetti aqparatty resmı derekkózderden alýǵa bolady.
– Mysaly, mektep janyndaǵy lagerlerdiń saıttarynda qujattar men hattamalar jarııalanady. Sondaı-aq bilim basqarmalarynan qajetti málimetterdi alýǵa bolady. Eger másele týyndasa, E-ótinish platformasy arqyly shaǵym joldaý múmkindigi bar, – dedi spıker.
Lagerdiń qaýipsizdigi tek qujattarmen shektelmeıdi. Sondyqtan ata-analar balalardyń tamaqtaný sapasyna da erekshe nazar aýdarýy qajet. Bul baǵytta qoǵamdyq baqylaý tetikteri qarastyrylǵan.
– Ata-analar komıteti as blogyna tekserý júrgize alady. Ár ónimniń sertıfıkaty bolýy qajet. Sonymen qatar daıyndalǵan taǵamdardyń synamalary bir apta saqtalady. Sondyqtan olardyń saqtaý merzimin baqylaý mańyzdy, – dedi ol.
Balalardyń densaýlyǵy men qaýipsizdigine lager qyzmetkerleriniń biliktiligi de tikeleı áser etedi. Sol sebepti mamandardyń qujaty men kásibı daıarlyǵy muqııat tekseriledi. Onyń ishinde medıtsınalyq kitapsha men qajetti sertıfıkattyń bolýy mańyzdy. Mundaı qujat lager jumysyn uıymdastyrýǵa arnalǵan arnaıy daıarlyq kýrsynan ótken qyzmetkerlerge beriledi.
Eske salaıyq, elimizde balabaqshadan oryn alyp beremin deıtin alaıaqtar kóbeıgen.
