Lager sózi ortalyq dep ózgertiledi – Oqý-aǵartý mınıstrligi
ASTANA. QazAqparat – Oqý-aǵartý mınıstrligi lager sózin ortalyq ataýymen ózgertý máselesin pysyqtap jatyr, dep habarlaıdy QazAqparat tilshisi.
«Mınıstrlik «Bilim berý uıymdary túrleriniń nomenklatýrasyn bekitý týraly» QR Bilim jáne ǵylym mınıstriniń 2013 jylǵy 22 aqpandaǵy № 50 buıryǵyna ózgerister engizý boıynsha jumystar júrgizilýde. Onda «lager» ataýyn «ortalyq» ataýymen almastyrý máselesi pysyqtalýda. Jalpy, jazǵy ýaqytta balalardy demalyspen, saýyqtyrýmen qamtamasyz etý jumystary jalǵasýda jáne mınıstrliktiń erekshe baqylaýynda»,- delingen Oqý-aǵartý mınıstri Ǵanı Beısembaevtyń Májilis deptýtaty saýalyna bergen jaýabynda.
Buǵan deıin Májilis depýtaty Dáýlet Muqaev keńestik ıdeologııamen sanamyzǵa sińgen lager sózin jazǵy saýyqtyrý ortalyqtary sózimen aýystyratyn ýaqyt jetkenin aıtyp, Oqý-aǵartý mınıstriniń atyna saýal joldaǵanyn jazǵan edik.
