Lady farmer: Agroónerkásipte jetistikke jetken áıelder marapattalady

ASTANA. KAZINFORM – Ulttyq Lady farmer baıqaýy resmı túrde bastaý aldy. Bul baıqaý elimizdiń agroónerkásiptik kesheninde eńbek etetin nemese óz bıznesin júrgizip júrgen áıelderdi qoldaý jáne damytý maqsatynda ótkizilip otyr.

Bul bastama aýyl sharýashylyǵymen aınalysatyn áıelderge óz jetistikterin kórsetýge, tájirıbesimen bólisýge jáne agrosektordyń damýyna qosqan úlesi úshin laıyqty marapat alýǵa múmkindik beredi.

Ulttyq statıstıka málimetteri boıynsha, Qazaqstannyń aýyldyq jerlerinde úsh mıllıonnan astam áıel turady, olardyń kópshiligi bilim berý, densaýlyq saqtaý, saýda jáne aýyl sharýashylyǵy salalarynda eńbek etedi. Eldegi árbir tórtinshi sharýa qojalyǵy nemese jeke kásipkerlik áıel adamnyń basshylyǵymen jumys isteıdi.

Uıymdastyrýshylardyń aıtýynsha, baıqaýǵa jańa bastaǵan fermerler de, iri agrokásiporyndardyń basshylary da qatysa alady. Ásirese ınnovatsııalar engizip, erekshe sheshimder taba biletin jáne sharýashylyǵyn damytýǵa umtylatyn qatysýshylarǵa basa nazar aýdarylady.

Fınalıster kelesi nomınatsııalar boıynsha anyqtalady: «AgroQueen 2025», «Miss Green Energy», «Aýyl Girl Power». Qazylar alqasynyń quramyna agrarlyq BAQ ókilderi men tanymal agroblogerler kiredi.

Baıqaýdyń fınaly men marapattaý rásimi 2025 jyldyń 17 shildesinde «Jańa Dala / Green Day 2025» halyqaralyq mamandandyrylǵan kórme-kórsetilimi aıasynda ótedi.

Baıqaýdy uıymdastyrýshy — Ulybrıtanııa Elshiliginiń qoldaýymen EXPO TIME kompanııasy.

Qatysý úshin úmitkerler anketany toltyryp, óz jetistikteri, qoldanatyn tásilderi men agrarlyq damýǵa qosqan úlesi týraly aqparatty joldaý qajet. 

Ótinimder 2025 jyldyń 1 shildesine deıin myna elektrondyq poshta arqyly qabyldanady.

Aıta keteıik, Astanada mereke qarsańynda qalalyq aýyl sharýashylyǵy jármeńkesi ótedi.