Labubu aınalasyndaǵy synnan keıin ıesi 4 mlrd dollar joǵaltty

ASTANA. KAZINFORM — Sońǵy eki kún ishinde trendke aınalǵan Labubu oıynshyqtaryn shyǵaratyn qytaılyq Pop Mart kompanııasynyń aktsııalary shamamen 9%-ǵa tómendedi, dep habarlaıdy AZERTADJ.

Bul kompanııanyń naryqtyq qunynyń 30,89 mlrd gonkong dollaryna (shamamen 3,93 mlrd AQSh dollary) azaıýyna alyp keldi. Bul týraly South China Morning Post basylymy jazdy.

Sheteldik BAQ málimetinshe, aktsııalardyń quldyraýyna Qytaı Kommýnıstik partııasynyń People’s Daily («Jenmın jıbao») gazetinde jarııalanǵan syn sebep bolǵan. Onda Pop Mart kompanııasynyń bıznes-modeli synǵa alynyp, ataqty oıynshyqtardyń táýeldilik týdyrýy múmkin ekeni eskertildi.

Pop Mart-tyń «soqyr qorapshalarynda» (ıaǵnı ishindegi oıynshyq kórinbeıtin qoraptarda) naqty qandaı oıynshyq bar ekenin satyp alýshy aldyn ala bilmeıdi. Kollektsıonerler eń sırek úlgilerdi ıelený úshin bir qorappen shektelmeı, qaıta-qaıta satyp alýǵa beıimdeledi. Alaıda sırek ári qundy oıynshyqty tabý múmkindigi 2%-dan tómen.

— Bul taýarlar — qaıta satyp alýdy yntalandyrý úshin kútpegen «syıaqylardy» paıdalanatyn «bıznes-qyspaqtar», — dep jazady People’s Daily zańgerler men sarapshylardyń pikirine súıene otyryp.

Gazet jasóspirimder men balalar mundaı júıege áldeqaıda osal ekenin atap ótken. Sebebi olarda psıhologııalyq jetilmegendik pen ózin-ózi baqylaý daǵdysy tolyq qalyptaspaıdy. Sondyqtan mundaı tájirıbeni qatań retteý qajet deıdi. Aıta keteıik, Qytaıda 2023 jyly 8 jasqa deıingi balalarǵa «soqyr qoraptardy» satý zańmen tyıym salynǵan bolatyn.

South China Morning Post basylymy People’s Daily gazetiniń 3 mıllıonǵa jýyq taralymy bar maqalasy Qytaı bıliginiń resmı ustanymyn kórsetetinin atap ótti.

Labubu — «monstr» beınesindegi, tisi aqsıǵan kúlkisimen erekshelenetin oıynshyq. Olar 2025 jyldyń kókteminde TikTok-taǵy basty trendke aınaldy.

Buǵan deıin Petropavlda jasóspirim oıynshyq vıntovkamen kóshede júrgenin jazǵan edik.