Labrador Bolgarııa parlamenti otyrystaryna turaqty túrde qatysatyn boldy
ASTANA. KAZINFORM – Bolgarııa parlamentiniń 52-shaqyrylymynda jańa dástúr engizildi – endi birde-bir otyrys ıttiń qatysýynsyz ótpeıdi. Bul týraly Bolgar ulttyq telearnasy habarlady.
Jýyrda Halyq jınalysynyń merziminen buryn saılaýy ótip, beısenbide jańartylǵan zań shyǵarýshy organnyń alǵashqy otyrysy ótti. Saılanǵan depýtattardyń qatarynda kórý qabileti nashar Ivan ıAnev bar. Osyǵan baılanysty ol arnaıy úıretilgen jetekshi ıttiń – Rover atty labradordyń kómegine júginedi. Parlament jumysy resmı bastalardan birneshe kún buryn olar ǵımaratqa baryp, ishki baǵyttardy aldyn ala zerttep, ortaǵa beıimdelgen.
ıAnev «Progressıvnaıa Bolgarııa» blogy atynan saılaýǵa qatysyp, bul birlestik Halyq jınalysyndaǵy 240 orynnyń 131-in ıelenip, absolıýttik kópshilikke qol jetkizdi. Parlament kýlýarlarynda tórt aıaqty serikke «241-depýtat» degen ázil ataý da berilgen. Endi labrador ıesin barlyq jerde – komıtet otyrystarynda da, plenarlyq májilis zalynda da erip júredi.
Buǵan deıin Italııa álemde alǵash bolyp úı janýary aýyrǵan jaǵdaıda oǵan kútim jasaý úshin aqyly demalys alýǵa resmı túrde ruqsat bergen edi. Endi jumys berýshiler qyzmetkerdiń ıti nemese mysyǵy aýyrsa ne ólse, úsh kúnge deıin aqyly demalys berýge mindetti. Buryn mundaı demalys tek jaqyn týystarǵa qatysty mańyzdy otbasylyq jaǵdaılarda ǵana qarastyrylatyn.
Aıta keteıik, jýyrda Eýroodaq janýarlardy qorǵaý sharalaryn qatańdatty.
Al elimizde úı janýarlaryn azaptaǵandar qylmystyq jaýapkershilikke tartylady. Naqtylaı tússek, Memleket basshysy «Taza Qazaqstan» bastamasyn damytý aıasynda janýarlarǵa qamqorlyq mádenıetin qalyptastyrý týraly aıtty.
