«La Skala» teatrynyń Astanaǵa gastroli aıasynda bıletter qoljetimdi bolady
ASTANA. QazAqparat - Qyrkúıek aıynda Astanada ótetin «La Skala» teatrynyń gastroli aıasynda kórermenderge arnalǵan bıletter quny belgili boldy, dep habarlaıdy QazAqparat.
«Gastrol kezinde bul ujymynyń ónerin tamashalaý úshin bıletter qoljetimdi. Atap aıtqanda, bılet quny 1 myńnan 30 myń teńgege deıin jetedi»,-dedi «Astana Opera» teatrynyń dırektory Ǵalym Ahmedıarov Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, qyrkúıek aıynda, ıaǵnı EKSPO kórmesiniń aıasynda 1, 4, 6, 8 qyrkúıekte ataqty ıtalııalyq ujym «Astana Opera» sahnasynda Dj. Verdıdiń operasy «Falstafty» usynady, al 7 jáne 9 qyrkúıekte Bethovenniń jaýhar týyndysy - ǵalamat №9 sımfonııasy zamanymyzdyń kórnekti maestrosy Zýbın Metanyń jetekshiligimen oryndalady.
Osy oraıda Ǵ. Ahmedıarov elorda turǵyndary men qonaqtarynyń nazaryna erekshe ári qyzyqty spektakl usynylatynyn atap ótti.
«La Skala» teatrynyń bas dırektory jáne kórkemdik jetekshisi Aleksandro Pereıra teatr ujymy Astanaǵa tolyq quramda keletinin atap ótti.
«Bul biz úshin eń mańyzdy jobalardyń biri. Atap aıtqanda, bıyl bizdi basqa eki elge shaqyrǵan bolatyn. Bul rette Qazaqstanǵa saparlaýǵa kelistik, sebebi Astana jańa mádenı ortalyq»,-dedi ol.
Aıta keteıik, «La Skala» teatrynyń gastrolderi QR Mádenıet jáne sport mınıstrliginiń qoldaýymen «EKSPO-2017» baǵdarlamasy aıasynda ótedi. Barlyq shyǵyndardy demeýshilik kórsetip otyrǵan «Eni» ózine alyp otyr.
Budan buryn habarlanǵandaı, Búgin Aqordada QR Memlekettik hatshysy Gúlshara Ábdiqalyqova álemge áıgili «La Skala» teatrynyń bas dırektory jáne kórkemdik jetekshisi Aleksandr Pereıramenkezdesti.
