«La Skala» elorda jurtshylyǵyna Djýzeppe Verdıdiń «Falstav» operasyn usynbaq
ASTANA. QazAqparat - Álemge áıgili «La Skala» teatry qyrkúıek aıynda elordaǵa tolyq quramda gostroldik saparmen keledi. Bul jaıynda búgin Aqordada elimizdiń Memlekettik hatshysymen kezdesýi aldynda BAQ ókilderine suhbat bergen atalǵan teatrdyń bas dırektory ári kórkemdik jetekshisi Aleksandr Pereıra aıtty, dep habarlaıdy QazAqparat.
«Bul joly biz úlken qurammen kelemiz. Onyń qatarynda orkestr, mýzykanttar, ánshiler, dırıjerlermen qatar sahna árleýshileri de bolady. Bul biz úshin óte mańyzdy jobalardyń biri bolmaq. Sebebi, QR Prezıdenti Nursultan Nazarbaev «La Skala» teatrynda eki ret boldy. Biz La Skala men Astana teatrynyń yntymaqtastyǵyn talqylaý múmkindigine ıe boldyq. Sondyqtan da aǵymdaǵy jyly eki memleketten shaqyrtý bolǵanyna qaramastan «La Skala» Qazaqstanǵa kelý týraly sheshim qabyldady. Óıtken Astana jańa mádenı ortalyqqa aınalyp otyr», - dedi ol.
Aleksandr Pereıranyń atap ótýinshe, elordada ótetin mádenı baǵdarlama aıasynda tanymal ıtalııalyq ujym «Astana Opera» teatrynyń sahnasynda Djýzeppe Verdıdiń «Falstav» operasyn usynyp, qazirgi zamannyń kórnekti maestrosy Zýbın Metanyń jetekshiligimen Lıýdvıg van Bethovenniń №9 sımfonııasyn oryndaıdy.
«Bul Djýzeppe Verdıdiń eń súıikti shyǵarmasy. Al Bethoven sımfonııasynyń eń basty máni halyqtardy biriktirý bolyp sanalady. Onyń ózeginde bizdiń barlyǵymyz da bir-birimizge baýyrmyz degen oı jatyr», - dedi «La Skala» teatrynyń dırektory.
Aıta keteıik, QR Memlekettik hatshysy Gúlshara Ábdiqalyqova álemge áıgili «La Skala» teatrynyń bas dırektory jáne kórkemdik jetekshisi Aleksandr Pereıramen kezdesýi barysynda taraptar opera jáne balet óneri salasyndaǵy yntymaqtastyqty damytý, «La Skala» teatrynyń Qazaqstandaǵy gastrolin jáne «Astana Opera» memlekettik opera jáne balet teatrynyń Italııadaǵy óner saparlaryn ótkizý tájirıbesin keńeıtý jaıyn talqylaǵan bolatyn .
