La-Mansh túbindegi týnneldiń qasynda mıgrant jasóspirim qaza tapty
ASTANA. QazAqparat - Frantsııanyń bıligi La-Mansh buǵazynyń túbindegi temirjol týnneliniń janynda boljam boıynsha, Afrıkadan kelgen mıgrant jasóspirimniń qaza tapqany týraly habarlady.
Aldyn ala málimetterge sáıkes, qaza tapqan jasóspirim 15 pen 17 jas aralyǵynda boldy. Beısenbige qaraǵan túni ony taýarlyq poıyz qaǵyp ketkeni habarlanyp otyr. Oqıǵanyń basqa egjeı-tegjeıleri aıtylǵan joq.
Maýsym aıynyń sońynan beri La-Mansh túbindegi týnneldiń qasynda Frantsııadan Ulybrıtanııaǵa zańsyz ótpek bolǵan keminde on adam qaza tapqan. Zańsyz qonys aýdarýshylar Ulybrıtanııaǵa jaqsy ómir súrý jaǵdaılaryn izdep barýda.
Qazirgi ýaqytta frantsııalyq Kale qalasynyń túbinde qurylǵan lagerde úsh myńǵa jýyq mıgrant turyp jatyr.
