La-Mansh buǵazynan ótpek bolǵan bes mıgrant qaza tapty

ASTANA. KAZINFORM – Bes mıgrant Ulybrıtanııaǵa jetý úshin adam toly qaıyqpen La-Mansh arnasyn kesip ótpek bolyp, Frantsııa jaǵalaýynda qaza tapty. Olardyń deneci seısenbi kúni Frantsııanyń soltústigindegi Vımereý jaǵajaıynan tabyldy. Júzge jýyq adam qutqaryldy, dep habarlaıdy Euronews. 

Pas-de-Kale departamentiniń prefektýrasynan atap ótkendeı, sol túni teńiz tynysh, aýa raıy ashyq boldy. Mıgranttardyń qaıyǵy qum jaǵasyna soǵylyp, aýdarylyp qalǵan dep boljanyp otyr.

Qaıǵyly oqıǵa Ulybrıtanııa parlamenti uzaqqa sozylǵan pikirtalastardan keıin pana izdeýshilerdi Rýandaǵa deportatsııalaýǵa ruqsat beretin zań qabyldaǵannan kúnniń ertesine boldy. Koroldik bılik elge teńiz arqyly keletin bosqyndar aǵynymen osylaısha kúresýge tyrysyp jatyr: tek 2023 jyly olardyń sany 30 myńǵa jýyqtaǵan.

Rıshı Sýnak úkimeti zańsyz mıgranttar Rýandaǵa kelip, Ulybrıtanııaǵa kóshý josparynan bas tartýǵa májbúr bolatynyna úmittenedi.

Brıtan premer-mınıstriniń aıtýynsha, pana izdeýshiler mingen alǵashqy ushaqtar eki-úsh aıdan keıin Kıgalıge ushyp, olardyń ótinishterin Ortalyq Afrıkadaǵy osy eldiń bıligi qaraıdy.

Konservatıvtik josparǵa oppozıtsııalyq leıborıster de, quqyq qorǵaýshylar da qarsy shyqty. Eýropalyq Adam quqyqtary jónindegi komıssary Maıkl Flaertı brıtan úkimetin bul zańdy joıýǵa shaqyryp, bosqyndardyń Rýandaǵa deportatsııalanýy adam quqyqtaryna qatysty alańdaýshylyq týdyratynyn basa aıtty.