La-Mansh arqyly ótpek bolǵan 157 mıgrant ajaldan aman qaldy
ASTANA. KAZINFORM – Frantsııa men Ulybrıtanııanyń qutqarý qyzmetteri La-Mansh buǵazy arqyly ótpek bolǵan 157 mıgrantty qutqardy. Eki el bıliginiń málimetinshe, bul 2018 jyldan bergi eń iri qutqarý operatsııalarynyń biri bolǵan. Bul týraly Euronews jazdy.
Oqıǵa Frantsııanyń izdestirý-qutqarý aımaǵynda bolǵan. Úrlemeli qaıyqtyń qozǵaltqyshy órtenip, artynsha qaıyq buzyla bastaǵan. Sonyń saldarynan jolaýshylar sýǵa sekirýge májbúr bolǵan.
Qutqarý jumystaryna Frantsııanyń eki qutqarý kemesi, áskerı-teńiz kúshteriniń tikushaǵy, medıtsına brıgadalary, sondaı-aq Ulybrıtanııanyń teńizde qutqarý jónindegi RNLI uıymy men Border Force shekara qyzmeti qatysty.
Nátıjesinde Frantsııa tarapy 103, al Ulybrıtanııa 54 adamdy qutqardy. Olardyń barlyǵy Býlon-sıýr-Mer portyna jetkizilip, medıtsınalyq kómek aldy.
Frantsııa bıliginiń málimetinshe, qaıyq Normandııadaǵy Vel-le-Roz aýylynan tańǵy saǵat alty shamasynda shyǵyp, jolǵa shyqqan sátten bastap qutqarý qyzmetteriniń baqylaýynda bolǵan.
Frantsýz teńiz bıliginiń málimetinshe, La-Manshty qoldan jasalǵan qaıyqtarmen kesip ótpek bolǵan mıgranttar kóbine ómirine tikeleı qaýip tóngenge deıin kómekten bas tartady. Qutqarýshylar qaıyq aýdarylyp ketpeýi úshin kúsh qoldanbaıdy.
Sońǵy jyldary mundaı qaıyqtardaǵy adamdar sany edáýir artqan. Eger 2021 jyly bir qaıyqta orta eseppen 26 adam bolsa, bıyl bul kórsetkish 65 adamǵa jetken. Keıingi aptalarda uzyndyǵy 12 metrge deıin jetetin úlken qaıyqtardyń paıda bolǵany da tirkeldi.
30 shildede La-Manshty kesip ótýdiń eki bólek áreketi kezinde tórt mıgrant qaza tapqan. AFP agenttiginiń frantsýz jáne brıtan bıliginiń derekterine súıenip habarlaýynsha, jyl basynan beri buǵazda keminde 14 adam kóz jumǵan. Ótken jyly mundaı áreketterden 29 mıgrant qaza tapqan edi.
Aıta keteıik, Marokkodan Seýtaǵa ótpek bolǵan 67 mıgranttyń qaza tapqanyn jazdyq.
Al bıyl mamyr aıynda Malaızııa jaǵalaýynda 37 zańsyz mıgranty bar qaıyq sýǵa batyp ketti.
