La Lıga basshysy Mbappeniń sózi úshin Qytaıdan keshirim surady
ASTANA. KAZINFORM — Mbappeniń sózi Qytaıda synǵa ushyrap, La Lıga basshysy keshirim aıtýǵa májbúr boldy, dep habarlaıdy Euronews.
Bári 26 qazanda, dúısenbi kúni Mbappeniń The Bridge shoýyna bergen suhbaty efırge shyqqannan keıin bastaldy. Áńgime barysynda fýtbolshy túrli suraqtarǵa ázil-qaljyńmen jaýap bergen. Sonyń biri: «Seni eń qatty kúldirgen mem qaısy?» degen suraq boldy.
Mbappe ózin eń kóp kúldirgen memde onyń bet-beınesi «áldebir adamnyń, shamasy, Qytaı dıktatorynyń» portretine qoıylǵanyn aıtty. Alaıda fýtbolshy Mao Tszedýnnyń esimin tikeleı atamaǵan.
Mao Tszedýn — Qytaı Kommýnıstik partııasynyń jetekshisi ári Qytaı Halyq Respýblıkasynyń negizin qalaýshy. Qytaıda ony memlekettiń negizin qalaǵan tulǵa retinde qurmetteıdi, al onyń beınesi synǵa ushyratýǵa bolmaıtyn taqyryptardyń biri sanalady.
Mbappe birneshe demeýshisimen kelisimshartynan aıyrylýy múmkin
Fýtbolshynyń suhbaty Qytaıda úlken narazylyq týdyrdy. AFP agenttiginiń málimetinshe, Qytaıdyń eń iri áleýmettik jelisi Weibo qoldanýshylarynyń biri: «Eger bul elde bıznes júrgizgiń kelse, bizdi qurmetteýdi úıren», — dep jazǵan.
Sportshynyń demeýshileri de onyń sózine narazylyq bildirdi. Seısenbi kúni olardyń úsheýi — Dongpeng sýsyn óndirýshisi, Mengniu sút ónimderi kompanııasy jáne Milkground irimshik óndirýshisi — Kılıan Mbappemen jarnamalyq kelisimsharttaryn dereý buzatynyn málimdedi.
— Bizdiń kompanııa ulttyq sezimderdi qorlaıtyn kez kelgen áreketke múldem tózbeý saıasatyn ustanady, — delingen Dongpeng kompanııasy málimdemesinde.
Al Mengniu kompanııasy Mbappemen yntymaqtastyqtyń barlyq túrin dereý toqtatatynyn habarlady.
Bul jaǵdaıǵa Qytaı Syrtqy ister mınıstrligi de pikir bildirdi. Vedomstvo ókilderiniń aıtýynsha, «Qytaı halqynyń sezimine tıetin sózder qoǵamnyń barlyq toptarynyń qarsylyǵyn týdyrmaı qoımaıdy».
Qytaı Ispanııa chempıonatynyń matchtaryn kórsetýdi toqtatty
Qytaıdyń ortalyq telearnasy Mbappe qatysatyn Ispanııa chempıonaty — La Lıga matchtarynyń kórsetilimin ýaqytsha toqtatty.
Óz kezeginde La Lıga prezıdenti Haver Tebas áleýmettik jelide málimdeme jarııalap, Qytaıdan keshirim surady.
Desde LALIGA lamentamos profundamente las declaraciones de Kylian Mbappé que han causado malestar y ofensa en China. Entendemos el daño ocasionado y, en nombre de LALIGA, quiero trasladar nuestras sinceras disculpas al pueblo chino. Durante muchos años hemos construido una relación de respeto, confianza y cooperación con China, sus autoridades, sus instituciones deportivas, sus operadores audiovisuales y millones de aficionados al fútbol español. No podemos permitir que una actuación individual empañe esa relación ni perjudique a los más de 20 clubes de nuestras competiciones profesionales y a millones de aficionados chinos. Estamos adoptando las medidas a nuestro alcance y trabajando directamente con nuestros socios e interlocutores en China para superar esta situación. Nuestro compromiso con China, su pueblo y sus instituciones es firme. Una relación construida durante tantos años no puede quedar dañada por un episodio individual.
— Javier Tebas Medrano (@Tebasjavier) October 27, 2026
— Kılıan Mbappeniń Qytaıda jaǵymsyz sezim men renish týdyrǵan sózderine qatty ókinemiz. Onyń qandaı zııan keltirgenin túsinemiz, — dep jazdy ol.
Tebastyń aıtýynsha, La Lıga jaǵdaıdy retteý úshin barlyq múmkin sharany qabyldap, Qytaıdaǵy seriktesterimen jáne áriptesterimen tikeleı jumys istep jatyr.
— Bizdiń Qytaıǵa, onyń halqyna jáne memlekettik mekemelerine degen qurmetimiz ózgermeıdi. Kóp jyl boıy qalyptasqan qarym-qatynas bir ǵana oqıǵanyń kesirinen buzylmaýy kerek, — dep atap ótti La Lıga basshysy.
Bul janjal Mbappeniń Qytaıdaǵy mıllıondaǵan jankúıerinen aıyrylýyna ákep soǵýy múmkin. Buǵan deıin «Real» shabýylshysy bul elde úlken tanymaldyqqa ıe bolǵan.
Qytaılyq jankúıerler Mbappeni «Nındzıa tasbaqalar» mýltserıalyndaǵy Donatelloǵa uqsastyǵyna baılanysty erkeletip «Gýıgýı» (tasbaqa) dep ataǵan.
Sońǵy álem chempıonaty kezinde Qytaı kórermenderine Frantsııa quramasynyń kapıtany Dongpeng energetıkalyq sýsynyn ishetin jarnama jıi kórsetilgen edi.
Budan buryn Qytaıda Mbappe qatysqan matchtar men jarnamalardy kórsetý toqtatylǵanyn jazǵanbyz.
