L.Júnisova: Úndi serıaldary túrik serıaldaryna qaraǵanda birshama arzan
ASTANA. QazAqparat - Qazaqstanda úndi serıaldaryn kórsetý túrik serıaldaryna qaraǵanda birshama arzan. Bul týraly búgin «Qazaqstan» ulttyq telearnasy» AQ basqarmasy tóraıymynyń birinshi orynbasary Lázzat Júnisova málim etti.
Onyń atap ótýinshe, «Qazaqstan» telearnasy «Kelin» teleserıalyn odan ary kórsetý, kórsetpeý máselesin jańa televızııalyq maýsym basynda qabyldaıtyn bolady.
«Biz árýaqytta da kórermenniń qalaýyna basa mán beremiz. Eger kórsetkishter bizdiń kútken nátıjege saı kelse, onda biz kórsetilimdi jalǵastyra beremiz. Al eger kórsetkish bizdiń jospardan tómen bolatyn bolsa, onda kórkemdik keńes sheshim qabyldaıdy», - dedi ol.
Sonymen qatar, ol «Kelin» serıalyn kórsetý quny kommertsııalyq qupııa bolǵandyqtan jarııa ete almaıtyndyǵyn aıta kele: «Biz serıaldy quqyq ıelenýshiden tikeleı satyp alamyz, sondyqtan baǵasy túrik serıaldaryna qaraǵanda birshama arzan. Buǵan qosa, bizdiń arnamyzda úndi serıaldarynyń reıtıngi joǵary», - dedi ol. Onyń aıtýynsha, Úndistanda serıal túsirý Túrkııaǵa qaraǵanda birshama arzan.
«Máselen, «Súleımen sultan» serıalynyń bir serııasynyń quny shamamen - 600 myń dollar. Al bizde bir serııany túsirýge shamamen 25-30 myń dollar ketedi. Úndistandyq áriptesterimizden bilýimizshe, olarda da bir serııa túsirý quny Qazaqstandaǵy baǵamen shamalas», - dedi L.Júnisova.
