L.Súleımen: Saılaý komıssııalarynyń is-áreketterine ne áreketsizdigine baılanysty shaǵym túsken joq
ASTANA. QazAqparat - Saılaý komıssııalarynyń is-áreketterine ne áreketsizdigine baılanysty shaǵym túspedi. Bul týraly búgin QR Ortalyq saılaý komıssııasynyń múshesi Lázzat Súleımen málim etti.
«Kezekten tys prezıdenttik saılaýdy baıqaý jónindegi EQYU/DIAQB mıssııasynan saılaý úderisiniń barlyq kezeńderin qamtıtyn 142 suraq kelip tústi. Jalpy alǵanda, mıssııa sarapshylaryna 50-den astam qujat, sondaı-aq aqparatyq jáne anyqtamalyq materıal berildi», - dedi L.Súleımen.
Sonymen qatar onyń atap ótýinshe, 24 sáýirdegi jaǵdaı boıynsha Ortsaılaýkomǵa azamattar men zańdy tulǵalardyń 94 ótinishi kelip tústi. Olar kandıdattardyń, saılaýshylardyń jáne basqa da saılaý úderisterine qatysýshylardyń quqyqtaryn óreskel buzý faktilerin qamtymaǵan jáne negizinen saılaý týraly zańnama normalaryn túsindirýdi suraǵan. Barlyq ótinishter belgilengen merzimde jáne zańnamaǵa sáıkes qaraldy.
«Saılaý komıssııalarynyń is-áreketterine ne áreketsizdigine shaǵymdar Ortalyq saılaý komıssııasyna kelip túsken joq. Alaıda, saılaýǵa baılanysty bir shaǵym Almaty qalasynyń aýdandyq sotyna jáne úsheýi Joǵarǵy Sotqa berildi. Olar is júrgizý normalaryna sáıkes qaraldy», - dedi QR OSK múshesi.
