L.N.Gýmılev atyndaǵy EUÝ men Astana ákimdiginiń arasynda din salasynda ózara yntymaqtastyq jónindegi memorandým jasaldy
ASTANA. QazAqparat - Bir jyldyń ishinde Astana ákimdigi halyq arasynda dindi túsindirý boıynsha 97 kezdesý ótkizip, olarǵa 200 myńnan astam adam tartyldy. Bul týraly búgin L.Gýmılev atyndaǵy Eýrazııa ulttyq ýnıversıtetinde ótken «Qazaqstandaǵy dinı ahýal: jastardyń dinı tanymyn arttyrý máselesindegi aqparattyq-aǵartý jumystarynyń róli» atty dóńgelek ústel otyrysynda Astana qalasy ákiminiń orynbasary Aıda Balaeva aıtty.
«Bir jyldyń ishinde Astana ákimdigi halyq arasynda dindi túsindirý boıynsha 97 kezdesý ótkizip, olarǵa 200 myńnan astam adam tartyldy. Biz jasaǵan osyndaı aqparattyq-aǵartý jumystary arqyly kóptegen adam keleshekte ózin jat dinı aǵymdardan qorǵap qala alatyndaı bilim jınady. Mundaı kezdesýlerge ásirese jastar jaǵy belsene qatysatyny qýantady», - dep atap ótti A. Balaeva.
Dóńgelek ústel barysynda L.Gýmılev atyndaǵy Eýrazııa ulttyq ýnıversıteti men Astana qalasy ákimdiginiń arasynda «Astana qalasynda konfessııaaralyq kelisimdi nyǵaıtý, din salasynda aqparattyq-aǵartý jumystaryn júrgizýde ózara yntymaqtastyq» jónindegi ekijaqty memorandýmǵa qol qoıyldy.
