L.N. Gýmılev atyndaǵy EUÝ álemniń úzdik 400 ýnıversıtetiniń qataryna kirdi - QS reıtıngi
ASTANA. 27 maýsym. QazAqparat - L.N. Gýmılev atyndaǵy Eýrazııa ulttyq ýnıversıtetinde QR Bilim jáne ǵylym mınıstri Baqytjan Jumaǵulovtyń tóraǵalyq etýimen Baqylaý keńesiniń kezekti otyrysy ótti. Bul týraly atalmysh JOO-nyń baspasóz qyzmetinen habarlady.
Baqylaý keńesiniń negizgi mindeti - joǵary oqý oryndarynyń qyzmetine qoǵamnyń qatysýyn, aıqyndylyq pen jaýapkershilikti qamtamysz etý. Búginde bilim salasyndaǵy ózgerister memleket, qoǵam jáne bıznestiń ózara árekettesýin qalyptastyrady. Baqylaý keńesi - halyqaralyq tájirıbede ázirlengen, bilim jáne densaýlyq saqtaý salasyndaǵy memlekettik kásiporyndardy korporatıvti basqarýdyń jańa úlgisi. Baqytjan Jumaǵulovtyń aıtýynsha, Baqylaý keńesteri elimizdiń árbir joǵary oqý ornynda úlgi jáne ónege etalony bolýy qajet.
2012 jyl L.N. Gýmılev atyndaǵy Eýrazııa ulttyq ýnıversıteti úshin 2020 jylǵa deıingi Damý strategııasyn tolyqqandy júzege asyrý jyly boldy. Strategııany júzege asyrý barysynda L.N. Gýmılev atyndaǵy EUÝ-dyń aldyna qoıǵan maqsattar men mindetterge qol jetkizýde bekitilgen strategııalyq baǵyttardy naqty oryndady.
Ýnıversıtettiń damý satylary 4 basym baǵytpen aıqyndalǵan bolatyn: básekege qabiletti mamandardy daıyndaý; ýnıversıtetti Eýrazııa keńistiginde zertteý ortalyǵy retinde qalyptastyrý; kadrlyq áleýet pen basqarý júıesin damytý; ınfraqurylym men materıaldyq-tehnıkalyq bazany damytý.
Básekege qabiletti kadrlardy daıarlaý jónindegi strategııanyń baǵytyn júzege asyrý qorytyndysy kelesideı: memlekettik tapsyrys boıynsha bilim alǵan túlekterdiń jáne mamandyǵy boıynsha jumysqa ornalasqandardyń úlesi 84,6%, al, halyqaralyq akkredıtteý agenttikteriniń bilim berý baǵdarlamalaryn akkredıtteý sany 16 birlikti quraýda, sonymen qatar L.N. Gýmılev atyndaǵy Eýrazııa ulttyq ýnıversıteti QS halyqaralyq reıtınginiń kórsetkishi boıynsha 17 000 joǵary oqý ornynyń arasynda 400 jetekshi ýnıversıtetteri qatarynan kórindi. Bir jylda 69 satyǵa joǵary kóterilip, 369-shy oryndy ıelendi. Munyń ózi TMD elderiniń bes úzdik ýnıversıtetiniń qataryna kirýge múmkindik berdi. Olardyń ishinde M.V. Lomonosov atyndaǵy Máskeý memlekettik ýnıversıteti (116-shy oryn), Sankt-Peterbor memlekettik ýnıversıteti (253-shi oryn), E.Baýman atyndaǵy Máskeý memlekettik tehnıkalyq ýnıversıteti (352-shi oryn) jáne Máskeý memlekettik halyqaralyq qatynastar ınstıtýty (367-shi oryn) bar.
Sondaı-aq, Strategııany júzege asyrý barysyna baqylaý úshin arnaıy Damý jáne akademııalyq saıasat jónindegi departament quryldy. Alaıda, strategııanyń keıbir bólimderin júzege asyrý barysynda jalpy birshama qıyndyqtar týyndaýda. Onyń ishinde magıstratýra jáne doktorantýradaǵy bilim berý baǵdarlamalaryna qatysty joǵary oqý ornynyń múmkindikterin shekteıdi.
L.N. Gýmılev atyndaǵy Eýrazııa ulttyq ýnıversıtetiniń rektory Erlan Sydyqovtyń baıandaýynsha, mınıstrlikterdiń tarapynan arnaıy mamandyqtarǵa degen qajettilikterdi anyqtaý qajet. Al, Bilim jáne ǵylym mınıstri Baqytjan Jumaǵulov osy oıdy órbite kele, tehnıkalyq mamandyq ıelerine degen suranysty tilge tıek etti jáne óndiris ıeleriniń qyzyǵýshylyq tetikterin anyqtaýǵa keńes berdi. Toqsan aýyz sózdiń tobyqtaı túıini retinde L.N. Gýmılev atyndaǵy Eýrazııa ulttyq ýnıversıteti 2020 jylǵa deıingi Damý strategııasyn oryndaý barysyndaǵy barlyq maqsatty kórsetkishterdi joǵary deńgeıde oryndap shyqty deýge tolyq negiz bar.
Bul rette Baqylaýshy keńesi tarapynan qoıylǵan tapsyrmalar L.N. Gýmılev atyndaǵy Eýrazııa ulttyq ýnıversıtetiniń basshylyǵy aldynda tolyǵymen oryndaldy.
