L.Gýmılev atyndaǵy EUÝ-da til máselesi talqylanady
ASTANA. 22 aqpan. QazAqparat - «24 aqpanda L.Gýmılev atyndaǵy Eýrazııa ulttyq ýnıversıtetinde Qazaqstan Pedagogıkalyq ǵylymdar akademııasynyń akademıgi, professor T.M.Ábdikárimniń 70 jasqa tolýyna oraı «Ana tili aıasy: til men ádebıet teorııasy jáne lıngvodıdaktıka máseleleri» atty respýblıkalyq ǵylymı-teorııalyq jáne ádistemelik konferentsııa ótedi»,-dep habarlaıdy atalmysh ýnıversıtettiń baspasóz qyzmeti.
Konferentsııa barysynda tildiń teorııalyq máseleleri, ana tildi oqytýdyń ádistemelik máseleleri, ádebıet teorııasynyń máseleleri, sonyń ishinde qazaq pedagogıkasynyń jetken jetistikteri men aldaǵy damý baǵyttary jan-jaqty saralanady dep kútilýde.
«Jalpy pedagogıka iliminiń qaı eldiń ǵylymynda bolsyn qurmetti orynda turatyny belgili. Bul sala arqyly ótpegen, oǵan moıyn burmaǵan ǵalym kemde-kem. Ǵylym-bilimniń barlyq salasynyń osy ilimge boı urýy da zańdy qubylys, óıtkeni, pedagogıka - tárbıe berý men bilim berýdi qatar alyp júretin birden-bir ilim. Onyń qyr-syryn túısine bilgen adam óz boıyna ımandylyq, eńbek, otansúıgishtik, estetıkalyq, ekologııalyq taǵy basqa da tárbıe túrlerin darytyp, adamgershilik tálimderin damyta otyryp, ózindik quzyrettiligin qalyptastyrady. Bul adamzatqa tán pedagogıkalyq taǵylymnyń ortaq máseleleri. Konferentsııanyń mańyzdy tustarynyń biri osynda», - delingen baspasóz baıanynda.
