L.Gýmılev atyndaǵy EUÝ-da stýdentterge arnalǵan alǵashqy kınoteatr ashylady
ASTANA. 16 naýryz. QazAqparat - 19 naýryz kúni L.Gýmılev atyndaǵy Eýrazııa ulttyq ýnıversıtetiniń «Bári de stýdentter úshin» baǵdarlamasy aıasynda
jas mamandar men stýdent-jastarǵa arnalyp salynatyn jańa turǵyn úıdiń alǵashqy qazyǵyn qaǵý jáne stýdentterge arnalǵan Qazaqstandaǵy tuńǵysh kınoteatrdyń saltanatty ashylý rásimi ótedi, dep habarlady atalǵan bilim ordasynyń baspasóz ortalyǵynan.
«Stýdenttik kınoteatr» jobasynyń basty maqsaty tarıhymyzǵa altyn árippen jazylyp qalǵan otandyq klassıkalyq kınotýyndylarmen qatar, qazirgi bilim-ǵylym men mádenıetti keńinen nasıhattaıtyn qazaqstandyq jáne sheteldik fılmderdi tamasha tehnıkalyq sapada kórsetý arqyly jastardyń dúnıetanymyn keńeıtý. Osyǵan oraı, «Qazaqfılm» men joǵary oqý orny arasynda memorandýmǵa qol qoıylmaq», - delingen habarlamada.
«Stýdenttik kınoteatr» jobasy arqyly ýnıversıtet stýdentteriniń mádenı demalysy anaǵurlym jemisti bolady. Munda jumsaq oryndyqtar, tamasha ekran, qýatty akýstıka, salqyndatý júıesi qarastyrylǵan. Osy arqyly ýnıversıtettiń elordalyq jáne elimizdegi jetekshi oqý orny retindegi ımıdji arta túspek.
Kınoteatrdyń ashylý saltanatyna belgili kınorejısser Rústem Ábdirashev, akterlar Nurjuman Yqtymbaev, Almagúl Álisheva jáne Májilis depýtattary, mınıstrlikter men elshilik ókilderi qatysady.
L.Gýmılev atyndaǵy Eýrazııa ulttyq ýnıversıteti Memleket basshysy N.Nazarbaevtyń tikeleı qoldaýymen ashylǵan joǵary oqý orny retinde stýdentterge sapaly bilim berip qana qoımaı, olardyń jan-jaqty tárbıeli azamat bolyp qalyptasýyna, ultymyzdyń patrıot ul-qyzdary bolyp ósýine etene kóńil bólip keledi.
