L. Gýmılev atyndaǵy Eýrazııa ulttyq ýnıversıteti álemniń úzdik 400 JOO tizimine iligip, 369-shy orynǵa shyqty
ASTANA. 11 qyrkúıek. QazAqparat - QS zertteý ortalyǵynyń basshysy Ben Saýterdiń aıtýynsha, QS World University Rankings reıtıngisinde Qazaqstannyń eki iri JOO dúnıejúziniń 400 úzdik JOO-lar qatarynan kórinýi joǵary bilimge degen turaqty ınvestıtsııanyń tıimdiligin arttyra túspek.
Bul týraly EUÝ-diń veb-ókildigi bólimi habarlaıdy.
2012 jyldyń qorytyndysyna sáıkes, EUÝ QS World University Rankings reıtıngisinde 369-shy oryndy ıelenip, úzdik 400 JOO tizimine ilikti. Bul aldymen, ýnıversıtettiń álemdik naryqtaǵy bilim berý salasy qyzmetinde deńgeıiniń joǵary ekendigin jáne bilim berý sapasynyń kúsheıgendigi men turaqtylyǵyn aıǵaqtaıtyny anyq.
Qazaqstan boıynsha atalǵan úzdikter tobynda Eýrazııa ulttyq ýnıversıtetinen keıin Ál-Farabı atyndaǵy Qazaq ulttyq ýnıversıteti (390-shy oryn) tur.
L.N. Gýmılev atyndaǵy EUÝ QS WUR reıtıngine 2009 jyldan bastap qatysýda. Atap ótetin jáıt, 2011 jylmen salystyrǵanda bilim ordasy 69 JOO-nyń aldyn orap, álemniń 400 úzdik ýnıversıtetteri qatarynan kórindi. «Ýnıversıtettiń mundaı belesterdi alýyna halyqaralyq jobalar men baǵdarlamalardyń qosqan úlesi, halyqaralyq bilim jáne ǵylym keńistiginde ýnıversıtetimizdiń belsendi atsalysýy áser etti» - delingen ýnıversıttet taratqan habarlamada.
Sonymen qatar, 2012 jyly atalmysh oqý ordasy taǵy bir jaǵymdy jańalyqpen tolyǵyp otyr. QR BǴM Ulttyq akkredıtteý ortalyǵy jyl saıyn júrgizetin Qazaqstannyń joǵary oqý oryndary arasyndaǵy bilim berý baǵdarlamalarynyń reıtıngisine sáıkes L.N. Gýmılev atyndaǵy Eýrazııa ulttyq ýnıversıteti 18 ýnıversıtettiń aldyn oraı otyryp, elimizdiń JOO boıynsha úzdik kópbeıindi oqý ordasy atandy. Munymen qosa, Germanııanyń ACQUIN halyqaralyq akkredıtatsııalaý agentiginiń sheshimimen L.N. Gýmılev atyndaǵy EUÝ-dyń on birdeı bilim berý baǵdarlamasy akkredıtatsııadan ótti.
QS WUR reıtıngisi boıynsha alǵashqy bestik qatarynda Massachýsets tehnologııa ýnıversıteti (AQSh), Kembrıdj ýnıversıteti (Ulybrıtanııa), Garvard ýnıversıteti (AQSh), Londonnyń ýnıversıtet kolledji (Ulybrıtanııa) jáne Oksford ýnıversıteti (Ulybrıtanııa) bar.
QS Reıtıngi, negizinen, ýnıversıtetter týraly ózderiniń pikirlerin aıtatyn sarapshylardyń suraqtaryn qamtıdy. Munda JOO-lar zertteýlik eńbek, jumys berýshilerdiń pikiri, sabaq berý, ınternatsıonalızatsııa sııaqty kórsetkishtermen baǵalanady. Reıtıng qorytyndysy 46 000 akademııalyq birlestik ókilderi men 25 000 rekrýter ókilderiniń saýalnama nátıjesi arqyly jasalady.
Búginde L.N. Gýmılev atyndaǵy EUÝ respýblıkany damytýdaǵy basym baǵyttary boıynsha ǵylymı zertteýler, jaratylystaný jáne gýmanıtarlyq ǵylymdar, qurylys, tehnıka men tehnologııalar, kásipkerlik jáne quqyq salasynda beıimdelgen joǵary mamandandyrylǵan kadrlardy daıarlaý boıynsha Qazaqstannyń bastaýshy ýnıversıteti bolyp tabylady.
Sonymen qatar, Bilim sapasyn qamtamasyz etý boıynsha táýelsiz Qazaqstan agenttigi (BSQTQA) 2011-2012 jyldary Qazaqstannyń joǵary oqý oryndarynyń qyzmetine júrgizilgen zertteý nátıjesinde L.N. Gýmılev atyndaǵy EUÝ - Qazaqstan JOO arasyndaǵy basty reıtıngi boıynsha alǵashqy orynǵa taban tiregen bolatyn.
Osydan bir jyl buryn Qazaqstan Respýblıkasynyń strategııalyq damý josparynda 2020 jylǵa deıin elimizdiń kemi eki ýnıversıteti álemdegi eń ozyq ýnıversıtetteri qatarynan kórinýi kerek degen maqsat qoıylǵan bolatyn. Búginde Eýrazııa ulttyq ýnıversıteti osy maqsatqa qol jetkizip otyr.
Álemniń úzdik JOO tizimimen myna www.topuniversities.com . saıt arqyly tanysa alasyzdar.
