Lejdegi qaıǵyly oqıǵa: 6 adam qaza boldy, onyń ishinde bir sábı bar, 120-dan astam adam jaraqattandy
LЬEJ-BRıÝSSELЬ. 14 jeltoqsan. QazAqparat /Dımash Syzdyqov/ - Belgııalyq Lej qalasynda keshe bolǵan qaıǵyly oqıǵanyń saldarynan 6 adam mert boldy, sonyń ishinde 23 aılyq sábı bar, 120-dan astam adam jaraqattandy, dep habarlady jergilikti quqyq qorǵaý organdary.
Belgııa ishki ister mınıstrliginiń resmı ókili Peter Mertens atap ótkendeı, bul oqıǵa lańkestik emes. Sonymen qatar ol bul qylmys nege lańkestik emestigin, qylmyskerdiń is-áreketiniń sebebin túsindirgen joq
Belgııa ІІM-niń málimetteri boıynsha, 32 jastaǵy qaskóı Nordın Amranı jalǵyz ózi áreket etken. Budan buryn ol qarýdy zańsyz saqtaǵany jáne úıinde qarasora ósirgeni úshin 5 jylǵa bas erkinen aırylǵan bolatyn.
Jergilikti polıtsııa oqıǵanyń qalaı bolǵanyn anyqtady. Jergilikti ýaqyt boıynsha 12:30-da kóshede adamdar asa kóp qarbalas kezde Sen Lamber alańynda qolynda sómkesi bar adam paıda bolǵan. Ol avtobýs aıaldamasyna qatarynan tórt granat laqtyryp, sodan keıin sómkesinen «FN FAL» avtomatty vıntovkasyn alyp, adamdarǵa qaraı birneshe oq atqan. Oq-dári taýsylǵannan keıin ol qashýǵa áreket jasamaı, ózin ózi atyp óltirgen.
Budan keıin polıtsııa Lejdiń búkil ortalyǵyn qorshap aldy. Adamdardy jáne barlyq kúmándi zattardy tekserý bastaldy. Lańkestikke qarsy jospar qurylyp, qoǵamdyq ǵımarattarda, sondaı-aq mektepter men balabaqshalarda qosymsha qaýipsizdik sharalary qolǵa alyndy. Oqıǵa ornyna Belgııa koroli Albert ІІ jáne eldiń jańa premer-mınıstri Elıo dı Rýpo keldi.
Qazirgi kezde alty adam qaza bolǵan, 120-dan astamy jaralanǵan dep sanalady. Alaıda mert bolǵandary sany kóbeıýi múmkin, óıtkeni jaralanǵandardyń birnesheýi aýyr halde jatyr.
Polıtsııa N.Amranıdiń beıbit turǵandarǵa oq atýynyń jaı-japsaryn anyqtaýda.
