«Qyzjylaǵan» qoıylymy: Máńgilik bala beınedegi Eńlik kórermendermen júzdesti
«Qanattylar» ınklıýzıvti teatry sahnalaǵan «Qyzjylaǵan» qoıylymy erekshe rejısserlyq sheshimimen kórermenderdiń ystyq yqylasyna bólenip, kózderine jas úıirdi.
«Qyzjylaǵan» – Semeı ıadrolyq polıgonynan múgedek bolyp, óspeı qalǵan qyz ómiri jaıynda. Sahnalyq qoıylym – ıadrolyq synaq polıgonynyń saldary, adam men tabıǵat ózara úılesimdiligi jáne adamgershiliktiń qaı dáýirde de adam janynyń jaýhary ekeni jaıly baıandaıdy.
Bir aıta keterligi, qoıylymnyń tusaýkeserine mángilik bala beıneniń prototıpi Eńlik ózi kelip qatysty.
«Polıgon kesirinen jarymjan bolyp qalǵan jandardyń sýretteri qoıylǵan fotokórmeden alǵash ret Eńliktiń sýretin kórdim. Bala beınede óspeı qalǵan jasóspirim perishte qyzdyń sýreti maǵan úlken áńgime jazdyrdy. Ol spektaklge aınaldy, ol kınofılmge aınaldy, ol qýyrshaq teatrynda oınaldy. Eger Táýelsizdik bolmaǵanda bundaı jabyq taqyryptardy men jaza almaǵan bolar edim. Táýelsizdiktiń arqasynda ashyq jazyp, jurtqa jetkize aldyq. Táýelsizdigimiz máńgi, ǵumyrly bolsyn. Men ózim Eńlikti búgin birinshi ret ómirde kórip turmyn, aınalaıyn ǵumyr jasyń uzaq bolsyn, perishe qyz!» - dedi Roza Muqanova.
Qoıylymdy tamashalaǵan Aqparat jáne qoǵamdyq damý mınıstri Darhan Qydyráli shyǵarmashylyq topqa shynaıy alǵysyn jetkizdi.
«Tebireniske toly keremet qoıylymdy kórdik. Biz qasiretimizdi qasıetimizben jeńgen halyqpyz. Osyndaı keremet shyǵarma úshin Roza apaıǵa alǵys aıtamyn. Osy týyndyny oryndaǵan «Qanattylar» ınklıýzıvti teatrynyń ónerpazdaryna rızashylyǵymdy bildiremin. Biz sizdermen maqtanamyz, sizderdiń shyn máninde qanattaryńyz bar. Osyndaı tazalyqtaryńyzben, shynaıy ónerlerińizben qalyqtaı berińizder», - dedi mınıstr.
Aıta keteıik, qoıylymnyń rejısseri - Maksım Abzalbek , «Qanattylar» ınklıýzıvti teatrynyń jetekshisi - Arnur Ysqaqov.
