Qyzyrhan Babaqumarulyna «Halyq kúıshisi» ataǵy berildi

ASTANA. QazAqparat – «Qazaqstan avtorlar qoǵamynyń» múshesi, «Qazaqstan Respýblıkasy kúıshiler odaǵynyń» múshesi, Qazaq mádenıetiniń qaıratkeri, belgili kúıshi Qyzyrhan Babaqumarulyna «Halyq kúıshisi» ataǵy berildi, dep habarlaıdy QazAqparat.

Aıta keteıik, Almaty oblysy Jambyl aýdandyq mádenıet úıinde Qyzyrhan Babaqumarulynyń «Altaıdan Alataýǵa kúı bolyp tógildim!» atty kúı keshi ótken edi. Osy keshte QR Kúıshiler odaǵy Almaty fılıalynyń tóraǵasy Talap Qarash Qyzyrhan Babaqumarulyna «Halyq kúıshisi» tósbelgisin tabystady.

Mádenı sharaǵa «Úkili dombyra» saıysynyń bas júldegeri, «Altyn dombyra» syılyǵynyń ıegeri Jolaýshy Turdyǵulov, T. Júrgenov atyndaǵy Qazaq Ulttyq óner akademııasynyń dotsenti Murat Ábýǵazy, Qurmanǵazy atyndaǵy Qazaq Ulttyq konservatorııasynyń dotsenti Qýanysh Jumaǵalı qatarly óner ıeleri qatysty.

Sonymen qatar, saltanatty keshte Qyzyrhan Babaqumarulynyń «Súıinshi» atty kitabynyń tusaýy kesilip, kópshilikke taratyldy. Dýmandy kesh avtordyń jeke kúılerin oryndaýmen jalǵasty.

Aıta keteıik, Qyzyrhan Babaqumaruly 1959 jyly qarashada Qytaıdyń Altaı aımaǵynda dúnıege kelgen. Eńbek jolyn Jemeneı aýdandyq №2 mektebinde ustazdyqtan bastaǵan. Qazir Almaty oblysy Jambyl aýdanynda turady. Ol – «Kúı-kerýen» degen atpen 60-tan astam kúıler toptastyrylǵan eki jınaqtyń avtory. Óziniń jıyrmadan astam avtorlyq kúıleri men ánderi bar. QR Ulttyq mýzeıdiń óner muraǵatyna 60-qa jýyq, «Dombyra» ulttyq telearnasyna 15 jáne «Shalqar» radıosynyń altyn qoryna 40-tan astam kúıdi engizip, qazaq halqynyń rýhanı qazynasyna óz úlesin qosqan.