Qyzyna zorlyq-zombylyq kórsetti dep aıyptalǵan ata-ana shyndyqty jaıyp saldy - OQO
ShYMKENT. QazAqparat - Ońtústik Qazaqstan oblysynda 7 jasar qyzdyń denesine ıne shanshylǵan degen aqparatty búgin ata-anasy joqqa shyǵardy. Túrkistan qalasynda buqaralyq aqparat quraldary ókilderimen kezdesken turǵyndar áleýmettik jelide taraǵan jaǵymsyz aqparatqa qatysty mán-jaıdy túsindirip berdi, dep habarlaıdy QazAqparat tilshisi.
Aıta keteıik, «Meıirim» eriktiler qoǵamy» qaıyrymdylyq qorynyń dırektory Arýjan Saın Facebook jelisindegi paraqshasynda OQO-da 2011 jyly týǵan Aına esimdi qyz týraly jazba jarııalaǵan bolatyn. Onda ol jetkinshektiń úıinde únemi qorlyq kóretinin aıtyp, 2016 jyldyń qańtarynda «DOM» qoryna qyzdyń ákesi balanyń kúıip qalǵan as qorytý joldaryn emdeý úshin shetelge jiberý týraly ótinishpen júgingenin jetkizgen.
Onyń aıtýynsha, qor qyzmetkerleri sheteldik klınıkalarǵa habarlasqan. Biraq usynylǵan qorytyndylar medtsına qyzmetkerleriniń tóbe shashyn tik turǵyzǵan. Búldirshinniń densaýlyǵyna únemi zaqym kelip otyrǵan. Bala bir jasynda bas-mı jaraqatyn alǵan. Bir jarym jasynda tamaǵyna ıne turyp qalyp, keıin as qorytý joly, aýzy men murny kúıip qalǵan. Oǵan qaýipti suıyqtyqty kúshtep ishkizgen. Bala sodan beri zond kómegimen tek suıyq tamaq qana ishedi. 5 jasynda onyń salmaǵy 8 keliden sál ǵana asqan. 2 jas segiz aılyǵynda búldirshinniń arqasy men keýdesine ıne tyqqan. Olardyń birnesheýin alý múmkin bolmaǵan. Ezofagıt, pnevmonııa, gepatomegalııaǵa shaldyqqan. Qor bas prokýratýraǵa aryz jazyp, keıin emdelýge Úndistanǵa jiberý úshin Almatydaǵy ǴZI respýblıkalyq klınıkasyna jatqyzýdy talap etken. Alaıda Aınanyń ákesi sheteldegi emdi qabyldaýdan bas tartyp, Qazaqstanǵa oralǵan. Qyzdyń ákesi qordyń prokýratýraǵa júgingenine ashýlanyp, hatty qaıtaryp alýdy talap etkenin aıtqan bolatyn.
Qoǵam belsendisi osy máselege oraı quzyrly organdarǵa habar bergenimen nátıje shyqpaǵanyn aıtqan bolatyn. Búgin osy máselege oraı qyzdyń ata-analary múldem basqasha ýáj aıtty. Aty-jónin kórsetpeýdi ótingen jetkinshektiń ákesi tipti Arýjan Saın taratqan aqpardyń 90-paıyzyn teriske shyǵardy.
«Meniń nómirim aýysqan emes jáne eshkim bul taqyrypqa habarlasqan emespin. Arýjanǵa ózimiz habarlassaq telefonyn árdaıym kómekshileri kóteredi, oǵan shyǵý múmkin emes jáne qyzymnyń salmaǵy men jaǵdaıyna qatysty aqparaty da jalǵan»,- dedi ákesi.
Óz sózinde ol qyzynyń basynan ıne alynyp, óńeshi kúıgenin rastady.
Alaıda búginde 7 jastan asqan qyzynyń salmaǵy 16 kg 800 grammdy quraıtynyn, dárigerlik tekserýde bolǵanyn atap ótti. Tipti belsendi bılep, esep shyǵaryp, jaqsy júrgenin habarlady. Al, qor basshysyn aıtqanyn jala dep otyr.
«Qordyń kómegi qatty tıdi dep aıta almaımyn. Ol kisiniń «ákesi de habarsyz, qyzdan habary joq. Qyz ólip qalýy múmkin» degen sózi shyndyqqa sáıkes kelmeıdi. Qordyń birneshe qyzmetkerimen áli kúnge deıin baılanysyp otyramyn. Bul maǵan jabylyp jatqan jala sııaqty. Ol kisiniń aıtyp jatqan nársesi durys emes. Men ómirde barmyn, ómir súrip júrmin. Qyzǵa 2016 jyly Almatydaǵy pedıatrııa jáne balalar hırýrgııasy ınstıtýtynda ota jasaldy. Qyzdyń deni saý, Qudaıǵa shúkir. Qordan óńeshi kúıgen qyzyma kómek surap, emdetýin surap otyrsaq, bizge problema jasap berdi. Bir jarym jyl tergeýde júrdik. Ótken jyldyń naýryz-sáýir aıynda ata-ana quqyǵynan aıyrylmasyn degen sot sheshimi shyqty»,-dedi búldirshinniń ákesi.
foto:newspile.ru
