Qyzyn órtep jibergen qaraǵandylyqtarǵa qatysty úkim ózgerissiz qaldy
QARAǴANDY. QazAqparat - Qaraǵandyda eki jasar qyzyn óltirgeni úshin búldirshinniń týǵan anasy men ógeı ákesine qatysty atyshýly qylmystyq is boıynsha shyqqan úkim ózgerissiz qaldy, dep habarlaıdy Qazaqparat tilshisi.
Azamattyq nekedegi erli-zaıyptylar, tergeý nusqasy boıynsha, qaqaǵan qys aıynda eki jasar qyzyn kóshede qaldyrǵan. Sodan keıin onyń qatyp qalǵan múrdesin Qaraǵandy shetindegi saıajaıdyń birinde peshke salyp órtep jibergen.
Іs materıaldarynda 2014 jyly týǵan qyzdy 2016 jylǵy aqpanda Qaraǵandy men Úshtóbe kenti arasyndaǵy alańqaıǵa qaldyryp ketken. Er adam ilese almaı kele jatqan ógeı qyzyn kútpeı, adymyn jyldamdatqan. Qyz ákesiniń artynan júgirip júrip, keıin izinen jańylyp qalǵan. Mas bolǵan sheshesi qyzyn birden izdeı qoımaǵan, tańerteń ǵana olar qyzdyń alańqaıda ákesine ilese almaı qalyp qoıǵanyn biledi. Olar balany óli kúıinde tapqan. Sodan keıin balanyń denesin saıjaıǵa ákelip, peshke salyp órtep jibergen.
Eske sala keteıik, Qaraǵandy oblystyq qylmystyq ister boıynsha mamandandyrylǵan aýdanaralyq sotynyń sýdıasy Islamhan Esenbaev Vladımır Zelenyıdy QR QK 99-baby «Adam óltirý» boıynsha, al onyń birge turatyn áıelin QR QK 434-baby «Qylmys týraly habarlamaý» boıynsha aıypty dep tapty.
«Aıypker Zelenyı Vladımır Valerevıch aıypty dep tanylsyn jáne alǵashqy bes jylyn túrmede ókizip, qatań rejimdegi kolonııada 23 jyl jazasyn óteý úkimi shyǵarylsyn. Sondaı-aq, aldyn ala maskúnemdikten emdeý sharasy taǵaıyndalsyn. Jaýapker Dragan Ilıana Vasılevna kináli dep tanylyp, 6 jylǵa bas bostandyǵynan aıyrylsyn jáne jazasyn óteıtin jerde aldyn ala maskúnemdikten emdelsin», - dep úkimdi oqyp berdi sýdıa Islamhan Esenbaev.
Er kisi men áıel adam maskúnemdikke salynyp, spırttik ishimdikti asyra paıdalanǵandyqtan, búldirshindi qaı kúni óltirgenderin naqty bilmeıdi. Eki kámeletke tolmaǵan bala (biri ekeýiniń ortaq balasy) balalar úıine berildi. Jeti jasar qyzy balalar úıinde bes jyldan beri tárbıelenip keledi. Al, kishi uly memleket qamqorlyǵyna alyndy.
