Qyzyn qutqarmaq bolǵan 43 jastaǵy aqmolalyq áıel sýǵa batyp ketti
Aqmola oblysy TJD baspasóz qyzmetiniń málimetinshe, jazataıym oqıǵa maýsymnyń 8-inde saǵat 13:00-de Tselınograd aýdany Otaýtúsken aýylynyń mańynda Nura ózeninde balyq aýlaý kezinde oryn alǵan.
«Ózen jaǵasynda júrgende qyzy anasynan ruqsat surap, sýǵa shomylmaqshy bolady. Alaıda, sýdyń aǵysy qyzdy alyp ketedi. Muny kórgen anasy qyzyn qutqarýǵa umtylǵan, biraq qatty aǵyn saldarynan 43 jastaǵy áıeldiń ózi sýǵa batyp ketti», - dedi vedomstvodan.
Al, jaǵadaǵy ósimdiktiń butaǵyna jarmasqan on jasar qyz janushyryp kómek suraǵan. Ony estigen Otaýtúsken aýylynyń 65 jastaǵy turǵyny Pavel Fedorenko qyzdy qutqaryp qaldy.
«Oqıǵa ornynda Nur-Sultan qalasy TJD Jedel-qutqarý jasaǵynyń qutqarýshylary jumys istedi, olar keshki saǵat 19:30 shamasynda áıeldiń denesin tapty», - dep tolyqtyrdy vedomstvodan.
