Qyzyn Dýbaıǵa alyp ketken ákesi anasyna qaıtarmaı otyr
ASTANA. QazAqparat - Dýbaıda qyzyn urlap áketken ákeniń isi qaralyp jatyr. Ol qamqorlyq jasaý quqyǵynan aıyrylǵannan keıin, qyzyn Qazaqstannan alyp ketken, dep habarlaıdy The National basylymy.
Sot qujattaryna sáıkes, olar 2010 jyly Qazaqstanda otbasyn quryp, bir jyldan keıin qyzdary dúnıege kelgen. 2014 jyly nekeleri buzylyp, sot qyzdyń anasymen qalýyna sheshim shyǵardy. Ákesi sot úkimine shaǵym túsirgenimen, jeńilis tapty.
«Meniń qorǵalýshym men onyń kúıeýi óz elderinde ajyrasty. Olardyń jergilikti soty qyzdyń qamqorlyǵyn anasyna bergen, alaıda, qyzdyń anasy balasyna ata-anasynyń ekeýiniń de tárbıesi kerek dep eseptegendikten, ákesine qyzyn kórip turýǵa, onymen birge saıahattaýǵa ruqsat berip, qol qoıǵan», - deıdi áıeldiń qorǵaýshysy Hasan Elhaıs.
Advokattyń aıtýynsha, ákesi berilgen kelisimdi paıdalanyp, qyzdy 2015 jyly alyp ketken, sodan beri ol anasyna ne kórsetpegen, ne sóılestirmegen. Osydan keıin ákesi qyzyn óziniń qamqorlyǵyna ótýin surap, burynǵy áıeline qarsy Dýbaı sotyna talap aryz jazǵan.
«Biz meniń qorǵalýshym men onyń burynǵy kúıeýi arasyndaǵy jazbalardy sot nazaryna usyndyq. Onda áıel kúıeýinen balasyn kórsetýin, tym bolmasa daýysyn estirtýin suraǵan, al ákesi qyzyn kórgisi kelse, Dýbaıǵa óziniń kelýin jazyp, áıeldiń analyq sezimimen «oınaǵandyǵyn» baıqaýǵa bolady. Ol júkti bolǵandyqtan Dýbaıǵa bara almaǵan soń, óziniń ákesin jibergen, al burynǵy kúıeýi ákesin uzaq kúttirip, aqyry kezdesýge kelmegen», - dedi advokat.
Dýbaı soty qorǵaýshynyń dálelderimen kelisip, istiń olardyń quziretinde emestigin aıtqan, burynǵy kúıeýine qyzdy qaıtaryp berýin buıyrǵan.
Elhaıstyń aıtýynsha, burynǵy kúıeýi qyzdy anasyna áli qaıtarmaǵan jáne sot úkimine shaǵym bildirgen.
«Biz apellıatsııalyq sotqa qatysyp, qorǵalýshymyzdy qoldaıtyn bolamyz», - deıdi ol.
