Qyzymnyń jeńisi barlyq ýaıymdy umyttyryp jiberdi – Jansaıa Ábdimáliktiń anasy
NUR-SULTAN. QazAqparat – Qazaqstannyń eńbek sińirgen jattyqtyrýshysy, Erler arasyndaǵy halyqaralyq grossmeıter Jansaıa Ábdimáliktiń anasy Alma Áshirova Gıbraltar týrnırindegi jeńisten keıingi áseri týraly aıtty, dep habarlaıdy QazAqparat.
«Sportshydan qaraǵanda ata-anasynyń qýanyshy 100 ese kóp bolatyn shyǵar. Jansaıa týrnırdi aıaqtaǵannan keıin ekeýmiz sóılesip otyrǵanda men qyzyma osy shaqtyń árbir sátin, árbir mınýtyn esime saqtaǵym keletinin aıtqan edim. Keýdemdi maqtanysh sezimi kernep turdy. Ony sózben jetkizý múmkin emes. Jaı ǵana otyryp, sol qýanyshty sáttegi kúıimdi esime saqtaýǵa tyrystym. Onyń tarıhı jetistigi sonshalyqty úlken. Ár azamat óziniń ómirlik isinde artynda iz qaldyrǵysy keletin shyǵar. Qyzymnyń tarıhı jetistigi shynymen de orasan», - dedi bapker ortalyq kommýnıkatsııalar qyzmetinde ótken brıfıngide.
Shahmatshynyń anasy týrnırde kileń myqty qarsylastar jınalǵandyqtan, ýaıym kóp bolǵanyn da eske aldy.
«Men barlyq qazaqstandyq analarǵa shyn júrekten osyndaı baqytty shaqty bastan keshirýdi tileımin. Osyndaı sátter bizdiń ómirimizdi uzartatyn bolsa kerek. Ákesi úıge kelgende ómirińe neshe jyl qosyp keldiń dep ázildedi. Men «Óte kóp jyl qosyp aldym» dep jaýap berdim. Týrnırdiń ózi qobaljýǵa toly boldy. Al qorytyndysy búkil ýaıym men qobaljýdy umyttyryp jiberdi. Ananyń baqyty barlyq jeńiske laıyq shyǵar. Búkil analar osyndaı baqytqa kenelsin», - dep túıindedi Alma Áshirova.
Buǵan deıin habarlaǵanymyzdaı, Memleket basshysy Qasym-Jomart Toqaev Jansaıa Ábdimálikti FIDE Gran-prıindegi jeńisimen quttyqtaǵan bolatyn.
Eske salsaq, atalmysh týrnırdegi jetistigi úshin otandasymyz erler arasyndaǵy halyqaralyq grossmeıster atanǵan.
