Qyzym Qazaq eline bir medal syılasa dep armandaımyn - Janbota Aldabergenovanyń anasy
Gúlnaz Jumabekqyzy, negizi, Janbota Olımpıadada óner kórsetkenge deıin eshkimge suhbat bermeımin dep oılap júrgenin aıtty, biraq QazAqparat tilshisiniń saýalyna jaýap berýge kelisti.
- Qyzyńyz Janbota tórtkúl dúnıe kóz tikken tórtjyldyqtyń basty dodasyna el namysyn qorǵaýǵa bara jytyr. Bundaıda analyq tilegińizben bólispeı qalaı únsiz qalasyz?
- Júregim qobaljyp tur. Beıne bir shyń basynan shyńyraýǵa qaraı qyzym emes, men sekirip kele jatqandaı sezimde júrmin. Týra bir jarysqa ózim qatysatyn adam sııaqtymyn. Osyndaıda aýyzyma sóz de túspeı qalady.
- Janbotany sport súıer qaýym jaqsy tanıdy. Talaı syndarly sátterde el namysyn abyroımen qorǵap keledi. Endi ózińizdi bizdiń oqyrmandarymyzǵa tanystyra ketseńiz, qaıda, kim bolyp qyzmet atqarasyz?
- Men bir keremet tulǵa emespin. Almaty qalasynyń turǵynymyn. Bilmegen bireýler Janbotanyń ata-anasy bildeı bir mekemeniń basshysy ne bolmasa qaltaly kásipker deýi de múmkin. Joq, jaı tiginshimin. Alla bergen úsh ul, úsh qyz - alty balamdy tárbıelep otyrǵan qarapaıym anamyn. Janbota - balalardyń úshinshisi. Ol ákesinen aıyrylǵaly mine, 12 jylǵa aıaq basyp qaldy. Jalǵyz ózim osy balalarymdy ákesiniń joqtyǵyn bildirmeı asyrap otyrmyn. Balalarymnyń osy jetistigin ákeleri kórmeı ómirden erte ketti.
- Sportpen tek Janbota ǵana aınalysa ma, álde baýyry, sińlileri de sportqa bardy ma?
- Ózinen keıingi Sattar degen bir inisi de sportpen aınalysyp, ápkesiniń jolyn qýyp júr. Ol da týra Janbota aınalysyp júrgen sport túrin tańdady. Osy birneshe kúnde Almatynyń atynan Mınsk qalasyna jarysqa attanaıyn dep jatyr.
- Buıyrsa, chempıondar otbasy bolaıyn dep turǵan sııaqtysyz...
- Aýzyńyzǵa maı, Alla sol kúnge jetkizsin. Analyq júregimmen tileımin. «Balalarymdy qoldap, bıikterden kórsete ber» dep sát saıyn jaratýshydan surap otyramyn.
- Qatelespesem, Beıjiń - Janbotanyń úshinshi Olımpıadasy. Bıylǵy dodaǵa attanar aldynda anasyna qandaı sert bergenin aıtyp berseńiz...
- Iá, bul - úshinshi Olımpıadasy. Sochıde úzdik ondyqqa enip, 6-orynnan kórindi. Ońtústik Koreıada da sál sáttilik jetispeı qaldy dep oılaımyn. Endi bıyl júldege iligedi dep úmitteneıik. Bári bir Allanyń qolynda ǵoı. Sportta «baq pen baby qatar shapsa» deıtin sóz bar ǵoı. Men de sol baǵy men baby qatar shaýyp, qazaqtyń qaradomalaq qyzy eline bir medal syılasa eken dep tilep otyrmyn. Qyzym ár jarysqa ketkende «ýaıymdamańyz anashym, bári jaqsy bolady. Buıyrsa júldemen oralamyn» dep meniń kóńilimdi aýlap, razy etip ketedi.
- Árıne, jarys bar jerde jeńis te, jeńilis te qatar júredi. Júldesiz kelgen kezinde renjigen sátterińiz boldy ma?
- Joq, sporttyń ózi bir úlken álem ǵoı. Onda bir kúni kómbege buryn jetesiń, bir joly kesh jetesiń. Bári biz oılaǵandaı bola bermeıdi ǵoı. Sol úshin ár jarysyna, ár jetistigine, ár sátsizdigine qurmetpen qaraýǵa tyrysamyn. Eń bastysy - úıge aman-esen oralǵany men úshin úlken qýanysh.
- Qyzyńyzǵa taǵy bir sálem joldasańyz...
- Aınalaıyn, Janbotam! Sáttilik serik bolyp, jeńis tuǵyrynan kórinip, qazaq eline bir medal syılap, elińniń kók baıraǵyn jelbiretip, ánuranymyzdy áýeletip oral. Men saǵan senemin, qazaq eli saǵan senedi. Barlyq olımpıadashylarymyzǵa sáttilik tileımin! Jeńisterimiz kóp bolǵaı. Alla barlyǵyna amandyq, jeńispen oralýǵa násip etsin.
- Áńgimeńizge rahmet!
