Qyzyljarlyq sheber adamnyń kóńil-kúıin «túsinetin» qýyrshaqtar jasaıdy
PETROPAVL. QazAqparat - Petropavldyq sheber Katıa Komarova ǵajaıyp Pasha qoıandary men qýyrshaqtaryn tigedi. Ol «QazAqparat» HAA tilshisine óziniń súıikti isi men jumysyndaǵy qıyndyqtary týraly aıtyp berdi.
Katıanyń jıyntyǵynda bir-birine uqsaıtyn qýyrshaq joq. Árqaısysynyń ózindik stıli men minezi bar.
«Qalaısha osylaı bolatynyn ózim de túsinbeımin. Múmkin, olardy jasaǵandaǵy kóńil-kúıime baılanysty shyǵar», - dep kúldi Katıa.
Katıa mamandyǵy boıynsha grafıka dızaıneri, biraq ol modeler bolýdy armandaǵan.
Qýyrshaqtardy jasaýda mata erekshe ról oınaıdy. Katıa qýyrshaqtardyń denesin jasaý úshin flısti - dene tústes trıkotajdan jasaıdy. Ol minsiz bolýy úshin arnaıy trıkotaj kerek. Ony tek ınternet-dúkenderden tapsyryspen nemese kórshi Reseıden aldyrady.
«Qazir men kózi aıqyn kórinetin qýyrshaqtar jasap júrmin. Oǵan tyǵyz matany qoldanamyn. Ony sáıkes túspen boıaımyn. Kózderin akrılmen jáne pastel qaryndashtarymen salamyn», - deıdi Katıa.
Taǵy bir másele - qalada qýyrshaqtar úshin shashtardyń bolmaýy. Ony da ınternet-dúkenderge tapsyrys berip, bir aıdyń ishinde alady.
«Maǵan kıim matalaryn Germanııadaǵy týystarym jiberedi. Aıaq-kıimderin foamırannan - jasandy kúderiden ózim jasaımyn. Toqylǵan kıimderi men bas kıimderi de meniń qolymnan shyqqan týyndylar», - dep kúldi Katıa.
Eń uzaq jáne qıyn jumys - qýyrshaqty sınteponmen toltyrý.
Bir oıynshyqty jasaýǵa bir-úsh kún ýaqyt ketedi. Barlyǵy onyń qıyndyǵyna, sheberdiń bos ýaqytyna jáne shabytyna baılanysty. Katıa munymen toqtap qalmaı, qazir balalar kıimderin tigýdi bastaǵan. 
