«Qyzyljar jylý jelileri» JShS-i aldaǵy 5 jylda jylý qubyrlarynyń 45 paıyzyn jańartpaq

Bul jaıly Almatyda «Ortalyq-Azııalyq elektrenergetıkalyq korporatsııasy» (OAEK) AQ men Eýropalyq qaıta qurý jáne damý bankiniń (EQDB) Ekibastuz, Qyzyljar, Pavlodar qalalarynyń jylý jelilerin jańartý týraly zaem kelisimine qol qoıý rásiminde aıtyldy.

«Jylý qubyrlarynyń bári birdeı jańartylmaıdy. Alǵashqy 5 jylda onyń 45 paıyzyn aýystyrý josparlanyp otyr. Bul aldaǵy ýaqytta jylý jelilerindegi ahýaldy jaqsartýǵa múmkindik beredi», - deıdi «Qyzyljar jylý jelileri» JShS-niń dırektory Andreı Kalınıchev.

«Ortalyq-Azııalyq elektrenergetıkalyq korporatsııasy» Dırektorlar keńesiniń tóraǵasy Aleksandr Klebanovtyń aıtýynsha, Eýropalyq qaıta qurý jáne damý bankinen alynatyn 30 myń dollarlyq kredıt enshiles «Pavlodar jylý jelileri» AQ men «Qyzyljar jylý jelileri» JShS kásiporyndaryna beriledi. Al bank pen Taza tehnologııalar qory birlesip qarjylandyratyn jobaǵa 10 mıllıon dollarǵa jýyq kredıt berilmek. Bul qarjy jelilerdi jańartý ınvestıtsııasy men aqyrǵy tutynýshylar úshin tarıfterdiń qoljetimdiligi qatynasyn ońtaılandarýǵa kómektesedi. EQDB-niń Mýnıtsıpıaldy jáne ekologııalyq ınfraqurylymdar bóliminiń aǵa bankıri Ekaterına Mıroshnık:«Bul bizdiń Taza tehnologııalar qorymen birlesip qarjylandyratyn Qazaqstandaǵy alǵashqy jeńildikti kredıttik jobamyz. Ol aýaǵa taralatyn zııandy zattardy azaıtýǵa óz septigin tıgizedi. Óıtkeni jylý qubyrlaryn jańartý arqyly energetıkalyq kompanııalar jylý jelisindegi shyǵyndy azaıtyp kómir tutynýdy aıtarlyqtaı azaıtady», - dep otyr.

Onyń aıtýynsha, jylý jelilerin jańartý baǵytynda qazir olarmen birqatar jergilikti atqarý organdary jumys júrgizýde. Sondyqtan aldaǵy ýaqytta EQDB mundaı jobalardy respýblıkanyń ózge óńirlerinde de júzege asyrýy múmkin.