«Qyzyljar SK» fýtbol klýby qysqa merzimdi demalysqa shyqty
PETROPAVL. QazAqparat – Soltústik Qazaqstan oblysynda tótenshe jaǵdaıǵa baılanysty «Qyzyljar SK» fýtbol klýbynyń ujymy qysqa merzimdi demalysqa ketse, hokkeı jáne voleıbol federatsııasy QR chempıonatynyń aıaqtalǵanyn málimdedi, dep habarlaıdy QazAqparat tilshisi.
SQO Dene shynyqtyrý jáne sport basqarmasy baspasóz qyzmetiniń málimetinshe, eldegi tótenshe jaǵdaıǵa baılanysty óńirdegi barlyq sporttyq uıymdar turǵyndarǵa dene shynyqtyrý-saýyqtyrý qyzmetterin kórsetýdi, buqaralyq is-sharalardy jáne jattyqtyrý sabaqtaryn ótkizý toqtatty.
«Oblystaǵy stadıondar jabylmaıdy. Ol jerde jeke sportshylardan basqa, turǵyndar da jattyǵa alady. Biraq halyqtyń kóp shoǵyrlanýyna jol berilmeıdi», - dedi óńirlik kommýnıkatsııalar qyzmetinde ótken brıfıngte sóz alǵan SQO Dene shynyqtyrý jáne sport basqarmasynyń jetekshisi Rýslan Esenalın.
16 naýryz ben 15 sáýir aralyǵynda SQO-da 76 sporttyq is-shara ótýi tıis bolatyn. Onyń 8 respýblıkalyq jarystar, 2 oqý-jattyǵý jıyny jáne 66 oblystyq deńgeıdegi sporttyq-buqaralyq is-sharalar. Eldegi jaǵdaıǵa baılanysty bul jıyndardyń 32 ótpeıtin boldy, al 44 keıinge qaldyryldy.
Rýslan Esenalınniń aıtýynsha, «Qyzyljar SK» fýtbol klýbynyń ujymy 27 naýryzǵa deıin demalysqa jiberildi. Al hokkeı jáne voleıbol federatsııalary QR chempıonatynyń aıaqtalǵanyn habarlady.
QR Ulttyq olımpıada komıtetiniń usynysymen Tokıoda ótetin jazǵy Olımpıada oıyndaryna qatysatyn sportshylar óz jattyqtyrýshylarymen daıyndyqty toqtatqan joq.
«Oblystaǵy sporttyq uıymdardaǵy qyzmetkerlerdiń bir bóligi ádettegideı jumystaryn jalǵastyrsa, endi bir bóligi qashyqtyqtan jumys isteýge kóshirildi. Al keıbiri kezekti aqyly eńbek demalysyna shyqty», - dedi Rýslan Esenalın.
