«Qyzyljar» qatarynan altynshy márte jeńiske jetti

ASTANA. QazAqparat – Fýtboldan Premer-lıga komandalary arasyndaǵy el birinshiliginiń 6-týrynda taǵy eki oıynnyń nátıjesi belgili boldy, dep habarlaıdy QazAqparat tilshisi.

Ekinshi oıyn kúnindegi alǵashqy kezdesýde Petropavldyń «Qyzyljary» syrt alańda Pavlodar oblysynyń «Aqsý» komandasymen kezdesti.

Petropavldyq klýb bıylǵy birinshilikti sátti bastady. Bes týrda birde-bir upaıdy shashaý shyǵarmaǵan olar týrnır kestesinde birinshi orynda turǵan edi. Bul joly da sol jeńisti joldy jalǵastyrdy.

Oıynnyń birinshi kezeńinde komandalar bir-biriniń qaqpasynan sańylaý taba alǵan joq.

Ekinshi kezeńniń sońyna taman «Qyzyljardyń» belsendiligi baıqaldy. Nátıjesinde olardyń qatarynan brazılııalyq shabýylshy Vıtor Rodrıges Hose 79-mınýtta alystan gol soǵyp ketti. Al, 82-mınýtta petropavldyq klýbtan Marat Shahmetov esepti ústemeleı tústi.

Osylaısha, «Qyzyljar» qarsylasynan 2:0 esebimen basym tústi. Qatarynan alty márte jeńiske jetken olar týrnır kestesindegi birinshi ornyn saqtap qaldy.

Endi atalǵan týrda «Aqtóbe» men «Atyraý», «Astana» men «Qaırat», «Ordabasy» men «Tobyl» oınaıdy.

Eske salsaq, 15 sáýirde «Qaısar» «Jetisýdan» 2:0 esebimen basym tússe, «Kaspıı» «Oqjetpesti» 2:1, «Shahter» «Maqtaraldy» 3:0 esebimen jeńdi.