«Qyzyljar - adaldyq alańy» jobalyq keńsesi qandaı máselelerdi sheshedi
NUR-SULTAN. QazAqparat - Soltústik Qazaqstan oblysyndaǵy 79 memlekettik mekeme ashyq formatta jumys isteıdi, al 95 basshy birinshi qabatta azamattardy qabyldaý bólmelerin ashty. Bul týraly SQO ákiminiń orynbasary Ǵanı Nyǵymetov.Antikor.live jobasynyń efırinde aıtty, dep habarlaıdy QazAqparat tilshisi.
«Ákimdikterdiń ashyq formatta jumys isteýiniń jaǵymdy tusy kóp. 9 ákimdik osy qaǵıda boıynsha jumys isteıdi. Jyl sońyna deıin taǵy 4 ákimdik ashyq formatqa aýysady dep josparlap otyrmyz. Adamdar qyzmet alý úshin qanshama esik qaǵyp, keńselerdiń tabaldyryǵyn tozdyrmaıtyn bolady. Ákimdikterdiń birinshi qabattarynda jer máselesi, sondaı-aq qujattardy rásimdeý boıynsha eń qajetti qyzmetterdi kórsete alatyn burysh jasalady.
Men Petropavl qalasy ákimdiginiń tabysty jumysyna toqtalyp ótkim keledi. Shynynda da, adamdar bılet alyp, óz kezegin kútip turady. Bul óte yńǵaıly. Men turǵyndarmen sóılestim, olar da osy jolmen qyzmet alýdyń yńǵaılylyǵyn atap ótti. Sonymen qatar, biz aýyldarda da ashyq formatta jumys isteıtin ákimdikter ashýdy josparlap otyrmyz», - deıdi Ǵanı Nyǵymetov.
Onyń aıtýynsha, 79 memlekettik mekeme osyndaı ashyq jumys formatyna kóshken. 95 basshy birinshi qabatta azamattardy qabyldaý bólmelerin ashqan. Ol úshin arnaıy bólek bólme bólingen.
«Ókinishke qaraı, karantınge baılanysty qazir qujat qabyldaý, qujat berý onlaın rejıminde júrgizilýde. Alaıda, jaǵdaı turaqtanǵannan keıin bári burynǵydaı jumys isteıdi dep senemin. Taǵy bir jańalyq - Agro Kómektiń ashylýy. Aýyl sharýashylyǵy basqarmasynda «bir tereze» qaǵıdaty boıynsha fermerler men kásiporyndar qyzmet ala alatyn oryn jasalady«, - dep atap ótti ol.
Áńgime barysynda oblys ákiminiń orynbasary «Qyzyljar - adaldyq alańy» jobalyq keńsesiniń qandaı máselelerdi sheshetinin jetkizdi.
«Aıta ketý kerek, «Qyzyljar - adaldyq alańy» jobalyq keńsesi joldardyń sapasyna erekshe nazar aýdarady. Joldar jóndelip, jańa joldar salynýda. Kóshelerdi jaryqtandyryp jatyrmyz, jol qurylysy men qurylys jumystaryn qadaǵalaımyz. Sondaı-aq, jer bólý máselesine erekshe nazar aýdarylady. Jańa úılerdiń qurylysyna qomaqty qarajat bólinýde. Sonymen qatar, qarjynyń qalaı bólinetinin, qurylys jumystary qalaı júretinin arnaıy baqylaý qajet. Osyǵan baılanysty qoǵamdyq baqylaý qurý kerek. Bul top kópshilik úshin ashyq formatta jumys isteıtin bolady. Kez kelgen turǵyn bizben baılanysyp, óz kózqarastaryn bildire alady. Sybaılas jemqorlyqpen kúres - bul tek quqyq qorǵaý júıesiniń ǵana emes, sonymen birge qoǵamdyq júıe men mekemelerdiń jumysy. Bul qundylyqtardy qalyptastyrý boıynsha úlken ıdeologııalyq jumys« - deıdi Ǵanı Nyǵymetov.
Sondaı-aq, Soltústik Qazaqstan oblysynda «Halyqtyq baqylaý» portaly iske qosylǵanyn aıta ketý kerek, onda turǵyndar túrli suraqtar men ótinishterge júgine alady.
«Jyl basynan beri 116 ótinish kelip tústi. Barlyq suraqtar ýaqytynda qarastyrylǵan. Karantın sharalary jeńildegennen keıin oblys ákimi turǵyndardy qabyldaý tájirıbesin qaıta bastaıdy. Turǵyndardy avtobýs qyzmeti, sýmen jabdyqtaý, joldar, elektr energııasy máseleleri tolǵandyrady. Sonymen qatar, biz ınfraqurylymdy damytýǵa qatysty máselelerdi múmkindiginshe sheshýge tyrysamyz. Bıyl 270 eldi mekende joldar, mektepter, aýrýhanalar jóndelýde, jaryqtandyrý jáne sýmen qamtamasyz etý máselesi sheshilýde», - dep atap ótti óńir basshysynyń orynbasary.
