Qyzylshanyń órshýi báseńdedi – Lıýdmıla Buırabekova
NUR-SULTAN. QazAqparat – Jasqa tolmaǵan balalardy egýdiń nátıjesinde qyzylshanyń órshýi báseńdegen, dep habarlaıdy QazAqparat tilshisi.
«Bıyl álemde qyzylshamen aýrý óte kóp tirkelgenin aıta ketkim keledi. Dúnıejúzilik densaýlyq saqtaý uıymynyń deregine qaraǵanda, alǵashqy jarty jyldyqtyń ózinde 2006 jyldan bergi eń joǵary kórsetkish tirkelgen. Bizdiń elde 10 myńnan astam qyzylsha jaǵdaıy tirkeldi. Barlyq óńirde bar. Ásirese Nur-Sultan qalasynda 3 myńnan astam adam, Shymkent qalasynda myńnan astam adam aýyrǵan. Qazir jaǵdaı mınıstrliktiń udaıy baqylaýynda», - dedi QR Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraıymy Lıýdmıla Buırabekova Ortalyq kommýnıkatsııalar qyzmetinde ótken brıfıngte.
Onyń aıtýynsha, 9 aılyq balalarǵa ekpe salý sharasy aýrýdyń órshýin baıaýlatqan.
«Aýrý oshaqtarynda tıisti sharalar júrip jatyr. Naýqastarmen qarym-qatynasta bolǵan 17 myń adam egildi. Qyzylshamen aýrý ásirese 1 jasqa tolmaǵan, ıaǵnı ekpe alyp úlgermegen balalardyń arasynda kóp bolǵanyn eskerip, sáýir aıynan beri 147 myńnan astam 9 aılyq nárestege ekpe saldyq. Olarmen birge 72 myń medıtsına qyzmetkeri vaktsınatsııalandy. Qazir eldegi qyzylshanyń órshýi sál báseńdedi. Shildedegi kórsetkish naýryz aıymen salystyrǵan 3,4 ese az. Naýryzda 1984 jaǵdaı tirkelse, shildede 586 syrqat tirkeldi», - dedi komıtet basshysy.
Eske salsaq, Ortalyq kommýnıkatsııalar qyzmetinde ótken brıfıngte «SQ-Farmatsııa» JShS basqarma tóraǵasynyń mindetin atqarýshy Berik Shárip elimizde balalardy týberkýlezge qarsy egý jumystary 2-3 aıǵa keshigýi múmkin ekenin habarlaǵan bolatyn.
