Qyzylshanyń asqynýy: Astanada 10 adam jansaqtaý bóliminde jatyr
ASTANA. QazAqparat - Qazaqstannyń Bas sanıtarlyq dárigeri Jandarbek Bekshın qyzylsha aýrýyna qatysty kezekti baqylaý sharalarynyń nátıjesin jarııalady. Oǵan sáıkes, Astana qalasynda qyzylshanyń kórsetkishi ortasha deńgeıden asyp ketken, dep xabarlaıdy QazAqparat tilshisi.
Qoǵamdyq densaýlyqty qorǵaý komıteti tóraǵasynyń aıtýynsha, sońǵy bir aptanyń ishinde respýblıka boıynsha qyzylshaǵa 438 adam shaldyqqan. Olardyń ishinde 282 adam - 14 jasqa deıingi balalar. Osylaısha, qyzylshamen aýyryp qalǵandardyń 65 protsenti balalardyń arasynda tirkelip otyr.
«Qyzylsha barlyq aımaqtarda tirkeldi. Astanada bir aptanyń ishinde 99 oqıǵa boldy. Osyǵan baılanysty aýrýxanada qosymsha kereýetter qoıylyp jatyr. Jalpy, respýblıka boıynsha 186 adam aýrýxanada em-dom alýda. Al Astanada 15 adam aýrýxanaǵa tústi. Olardyń ishinde 10 adam jansaqtaý bóliminde jatyr. Qaıǵyly oqıǵalar tirkelgen joq», - dedi J.Bekshın Astanada ótken baspasóz máslıxatynda.
Onyń sózine qaraǵanda, bir aptanyń ishinde qyzylshamen aýyryp qalǵandardyń basym bóligi Atyraý (46), Jambyl (24), Mańǵystaý (16), Soltústik Qazaqstan (30), Pavlodar (27) jáne Túrkistan (41) oblystarynda, Astana (99) jáne Shymkent (100) qalalarynda tirkeldi. «Endi, respýblıka boıynsha ortasha kórsetkish tómendep jatqan joq. Al Astana qalasynda asyp ketti», - dep atap kórsetti J.Bekshın.
Bas sanıtar qazaqstandyqtarǵa vaktsınatsııadan ótýge keńes berip otyr. QR Densaýlyq saqtaý mınıstrligi vaktsınany satyp alýǵa qosymsha 580,9 mıllıon teńge bólip berdi. Oǵan qyzylshaǵa qarsy taǵy 478 myń vaktsına satyp alynady. Jospar boıynsha 1 sáýirde vaktsınatsııa bastalady.
