Qyzylshaǵa qarsy ekpeniń qaýipsizdigi kúmán týdyrmaıdy - Dúnıejúzilik densaýlyq saqtaý uıymy
«DDU-nyń málimetinshe, qyzylshaǵa qarsy ekpe ondaǵan jyldar boıyna búkil álemde tabysty qoldanylýda jáne qaýipsizdik turǵysynan óte jaqsy sıpatqa ıe. 2000 jyldan bastap búgingi deıin bul ekpeni paıdalaný álemde 15 mıllıondaı adamnyń ómirin saqtaýǵa múmkindik berdi. Qazaqstanda ımmýndaý sharasy úshin Úndistannyń State Serum Institute kompanııasynan satyp alynǵan qyzylshaǵa qarsy monovalentti tiri ekpe qaýipsiz jáne tıimdi bolyp tabylady. Ol ǵalamdyq aýqymda paıdalaný arqyly rastaldy», - delingen QR Densaýlyq saqtaý jáne áleýmettik damý mınıstrliginiń málimetinde. DDU málimetinshe, bas aınalý, talyp qalý, bas aýyrý sııaqty tirkelgen ýaqytsha aýrý belgileri ımmýndaýǵa qatysty alańdaýshylyq reaktsııasy bolyp tabylady. Mundaı jaǵdaılar jıi kezdesedi jáne onyń vaktsınaǵa qatysy bolmaıdy.«Mańǵystaý oblysyndaǵy zertteý jumystary aıaqtalǵansha ımmýndaýdan keıin oryn alǵan oqıǵalardyń sebepteri jóninde eshqandaı boljam aıtýǵa bolmaıdy. Qazaqstan úkimeti qyzylshaǵa qarsy ekpe júrgizýdi ýaqytsha toqtatý týraly jaýapty sheshim qabyldady. Shara 2 naýryzda jalǵasyn tabady dep oılaımyz. Aıta ketetin jaıt, Qazaqstanda ekpe jasalmaǵan nemese tolyq jasalmaǵan balalar men jastar arasynda qyzylsha aýrýyn juqtyrý táýekeli áli saqtalyp otyr. Atalǵan sharanyń maqsaty - osy táýekeldi azaıtý»,-dep málimdedi DDU Qazaqstandaǵy ókildiginiń jetekshisi, doktor Melıta Výınovıch. Aıta keteıik, bıylǵy 19 aqpandaǵy jaǵdaı boıynsha, elimizde 15-19 jas aralyǵyndaǵy 500 myńdaı adamǵa ekpe jasaldy. Solardyń ishinde búgingi kúnge deıin Qaraǵandy, Mańǵystaý, Jambyl, Ońtústik Qazaqstan jáne Atyraý oblystarynda jalpy 120-ǵa jýyq adam bas aınalý, bas aýyrý, aıaq-qolynyń uıýy, dene qyzýynyń kóterilýi sııaqty shaǵymdarmen dárigerlerge habarlasqan. Kóp jaǵdaıda olardyń ımmýndaý sharasyna qatysy joq, jasósipirimderge tán psıhoemotsıonaldyq turaqsyzdyqty esepke alǵanda jeke sezimtaldyqtyń kórinisi retinde baǵalanýda. «Osyǵan oraı DDU bastapqy baǵalaý nátıjelerimen kelisedi, bul oqıǵalar vaktsınany paıdalanýmen baılanysty bolmaýy múmkin. Vaktsınanyń sapasy men qaýipsizdigine kúmándanýǵa eshqandaı sebep joq», - dep atap kórsetti doktor Výınovıch. Shaǵymdanǵandar ekpe jasalǵandardyń jalpy sanynyń 0,02% quraıdy, al DDU málimetinshe, mundaı jaǵdaılar 15%-ǵa deıin jetýi múmkin jáne oryndy. Qalyptasqan jaǵdaıdy zertteý úshin elimizdiń barlyq óńirlerinde QR Densaýlyq saqtaý jáne áleýmettik damý mınıstrliginiń, Ulttyq ekonomıka mınıstrliginiń Tutynýshylardyń quqyqtaryn qorǵaý jónindegi komıtetiniń, respýblıkalyq medıtsınalyq uıymdar mamandarynyń qatysýymen jumys komıssııalary qurylyp, jumys isteýde. Jaǵdaıdy qosymsha zerttep, baǵalaý úshin DDU mamandary tartyldy.