Qyzylordanyń sol jaǵalaýy Astana úlgisimen salynyp jatyr
ASTANA. QazAqparat - Qyzylordada qalanyń jańa bóliginiń qurylysy bastaldy. Bul týraly oblys ákimi Qyrymbek Kósherbaev QR Úkimetinde ótken baspasóz máslıhatynda aıtty, dep habarlaıdy QazAqparat tilshisi.
Qalanyń sol jaǵalaý bóligin ıgerý memlekettik-jeke áriptestik tetigi boıynsha júrgiziledi.
«Jaqynda Memleket basshysy Qyzylordaǵa keldi jáne Astana úlgisimen qarqyndy damyp kele jatqanymyzǵa kýá boldy. 15 shaǵynaýdannan turatyn qalanyń jańa bóligi boı kóteredi. Alǵashqy shaǵynaýdannyń qurylysy bastalyp ketti», - dedi Kósherbaev baspasóz máslıhatynda.
Onyń aıtýynsha, Qyzylordanyń sol jaǵalaýynda 18 qabatty úıler, jastar ortalyǵy, ýnıversıtet qalashyǵy jáne ózge de mańyzdy nysandar turǵyzylady. Jańa jylǵa deıin alǵashqy nysan - 320 oryndyq balabaqshany paıdalanýǵa berý josparlanǵan.
Jalpy qala boıynsha memlekettik-jekeshelik áriptestik negizinde kásibı-tehnıkalyq bilim berý, densaýlyq saqtaý, kólik ınfraqurylymy salalaryndaǵy 22 mlrd teńge bolatyn 29 joba boıynsha jumystar júrgizilýde.
