Qyzylordanyń Shıeli aýdanynda jańa aýrýhana salyna bastaldy
QYZYLORDA. QazAqparat - Qyzylorda oblysynyń Jańaqorǵan jáne Shıeli aýdandarynda saltanatty jaǵdaıda jańa sport kesheni ashylyp, aýdandyq emhananyń irgetasy qalandy, dep habarlady QazAqparat tilshisi.
Shıeli kentinde qurylysy bastalǵan ortalyq aýrýhana 150 jatyn orynǵa shaqtalǵan.
«Elbasymyz Nursultan Ábishuly Nazarbaev jyl saıynǵy Joldaýlarynda ult densaýlyǵyn jaqsartý jaıyn udaıy aıtyp keledi. Osy rette, memleket tarapynan turaqty qoldaýdyń nátıjesinde elimizdiń densaýlyq saqtaý salasy júıeli túrde damý ústinde. Sońǵy eki jyldyń ishinde Syr óńirinde zamanaýı qural-jabdyqtarmen qamtylǵan 41 densaýlyq saqtaý nysany salyndy. Shıeli aýdanynda birazdan beri sheshilmeı jatqan másele - jańa aýrýhananyń qurylysy bolatyn. Búgin, mine, biz onyń qurylysyn bastadyq. Aýrýhana kelesi jyly paıdalanýǵa beriledi dep josparlanýda»,- dedi oblys ákimi Qyrymbek Kósherbaev.
Sondaı-aq aımaq basshysy men QR Parlamenti Senatynyń depýtaty Murat Baqtııaruly Shıeli aýdanynda memlekettik-jekemenshik áriptestik aıasynda salynǵan 200 oryndyq sporttyq-saýyqtyrý kesheniniń ashylý saltanatyna qatysty. Jalpy quny 42 mln. teńgeni quraıtyn sport kesheninde kúres, boks, kishi fýtbol, voleıbol sııaqty sport túrlerine arnalǵan zaldar bar.
Odan bólek, aımaq basshysy aýdan ákimderiniń halyq aldyndaǵy qorytyndy esep berý jıyndaryna qatysty.
«Aýdandardyń áleýmettik-ekonomıkalyq damý kórsetkishteri jaqsy, degenmen, osymen shektelýge bolmaıdy. Birneshe jyldar buryn Qyzylorda oblysy áleýmettik-ekonomıkalyq damý qarqyny boıynsha sońǵy orynda edi, al qazir aımaǵymyz kóptegen kórsetkishter boıynsha aldynǵy qatarda. Biz jańa dáýirde ómir súrýdemiz, sondyqtan onyń erejelerine baǵynýymyz qajet. Elbasynyń bıylǵy Joldaýyndaǵy basty mindet - barlyq salalardy tsıfrlandyrý, sondyqtan nátıjege qol jetkizý úshin biz zaman talabyna saı bolýymyz kerek. Ol úshin barlyq múmkindikter bar. Joldaýdy júzege asyrý barysy árqaısymyzdyń jumysymyzǵa baılanysty», - dedi ol.
Sondaı-aq, óńir basshysy 2018 jyl Qyzylorda oblysynda jappaı kásipkerlikti damytý jyly dep jarııalanatynyn málimdep, shaǵyn jáne orta bıznesti damytý máselesine de erekshe kóńil bólýdi tapsyrdy.
Aıta keteıik, sońǵy bes jylda Qyzylorda oblysynda 57 medıtsınalyq nysan, onyń ishinde Aral, Qazaly jáne Shıeli aýdandarynda ortalyq aýrýhanalar ashyldy. 2018 jyldyń qańtar aıynan bastap Baıqońyr qalasynda 15 myń qazaqstandyqqa qyzmet kórsetetin emhana jumysyn bastady.
Sonymen qatar, aldaǵy úsh jylda taǵy da 100 densaýlyq saqtaý nysany salynbaq.
Sońǵy úsh jylda oblysta 9 sporttyq nysan paıdalanýǵa berildi. Al ótken jyly Qyzylordada memlekettik-jekemenshik áriptestik aıasynda boı kótergen sporttyq-saýyqtyrý kesheni óz jumysyn bastaǵan bolatyn. Sondaı-aq, aımaqtyń 7 eldi mekeninde de sport keshenderiniń qurylysy júrip jatyr.
Foto: osken-onir.kz
