Qyzylordanyń ońtústiginde Darııa muzy erı bastady: Qutqarýshylar saqadaı saı otyr
QYZYLORDA. QazAqparat - Syrdarııanyń Qyzylorda qalasynyń ońtústik bóligindegi tusynda muzdar erı bastady. Osyǵan baılanysty saqtyq sharalar kúsheıtildi, dep habarlaıdy QazAqparat tilshisi.
Qyzylorda oblystyq jumyldyrý daıyndyǵy basqarmasynan málim etkendeı, uzyndyǵy 171 shaqyrym bolatyn qorǵanys bógetterine jóndeý jumystary júrgizilgen. Syrdarııa jaǵasyndaǵy qaýipti aımaqtar qatań baqylaýǵa alynyp, arnaıy tehnıkalar men jaýapty mekemeler tótenshe jaǵdaıdyń aldyn alýǵa saqadaı-saı daıyn otyr. Degenmen, mamandardyń aıtýynsha, seńniń ýaqytynda júrýine aýa raıynyń qolaısyzdyǵy kedergi keltirýi múmkin.
Qazirgi kúni oblys aýmaǵyna joǵary sý kózderinen sekýndyna 200 tekshe metr sý kelip túsýde. Aldaǵy ýaqytta onyń kólemi azaıýy múmkin. Degenmen, bul qol qýsyryp otyrýǵa bolady degen sóz emes.
«Búginde Jańaqorǵan aýdanynda muz tolyqtaı erip boldy desek bolady. Endi Shıeli aýdanyndaǵy jaǵdaıdy baqylaýǵa alatyn bolamyz. Jalpy, oblys aýmaǵynda 95 qaýipti aımaq bar. Aýa raıynyń jaýyn-shashyndy bolýyna baılanysty kez kelgen jaǵdaıǵa daıyn bolýymyz kerek. Bul rette, «Kóktem - 2018» oqý-jattyǵýy uıymdastyrylatyn bolady. Mamandardyń oqys oqıǵa kezindegi áreketterin pysyqtamaqpyz. Jalpy, ózendegi jaǵdaı turaqty», - dedi Qyzylorda oblystyq jumyldyrý daıyndyǵy basqarmasynyń basshysy Serik Sermaǵambetov.
