Qyzylordanyń qurylys ónimderin ázirleıtin óz kombınaty bar
QYZYLORDA. QazAqparat - Qyzylordadaǵy «RMZ-Shapaǵat» JShS qalanyń ońtústik ónerkásip aımaǵynda turǵyn úı qurylys kombınatyn ótken jyldyń sáýir aıynda iske qosqan bolatyn.
Seriktestik óz ónimderin bıyldan bastap tapsyrys bergen aýdandarǵa da jetkizýde, dep habarlaıdy QazAqparat HAA tilshisi. Jańa óndiris ótken jyldyń ózinde naqty kólemde 4600 sharshy metr daıyn úlgidegi beton ónimderin shyǵarǵan. Tapsyrys bolsa, daıyndalatyn ónim kólemi de arta beredi.
Syr óńirinde qurylys qarqyn alyp, Qyzylordanyń alyp qurylys alańyna aınalǵanyna 4-5 jyldyń júzi boldy. Osy oraıda qoljetimdi turǵyn úı baǵdarlamasy aıasynda qalada 11 shaǵynaýdan boı kótergenin aıtsaq ta jetkilikti. Alaıda, qurylysqa qajetti materıaldyń denin elimizdiń ózge aımaqtarynan tasymaldap júrmiz. Kombınattyń iske qosylýy bul ózekti máseleni sheshýge septigin tıgizedi. Óıtkeni, ótken jyly boı kótergen «Araı-3» shaǵynaýdany men Jappasbaı batyr kóshesi boıyndaǵy kópqabatty turǵyn úılerge osy óndiristiń ónimderi paıdalanyldy.
Aıta keteıik, quny 1,5 mlrd teńgeni quraıtyn joba «Ónimdilik-2020» baǵdarlamasy sheńberinde júzege asty. Biregeı kásiporynǵa syrtqy ınjenerlik ınfraqurylym jobaǵa 12,5 paıyz úlespen qatysýshy «Baıqońyr» ÁKK» UK» AQ qarjysy esebinen jetkizildi. Joba qarajatynyń 938,4 mln teńgesi - lızıng zatynyń, ıaǵnı kásiporynǵa qajetti qural-jabdyqtyń quny. Nesıe jergilikti kompanııaǵa memlekettik baǵdarlama aıasynda «Qazaqstannyń Damý Banki» AQ enshiles kásiporny bolyp tabylatyn «QDB-Lızıng» AQ arqyly berildi. Al kásiporynǵa qajetti qural-jabdyq ozyq tehnologııany meńgergen «WEILER» kompanııasynan kelisimshartqa sáıkes ákelindi.
Úı qurylysy kombınaty germanııalyq tehnologııa boıynsha jumys isteıdi. Qurylǵylar tolyq avtomattandyrylǵan. Oblysta salynatyn kópqabatty turǵyn úılerdiń qabyrǵa jabyndysy men irgetas bloktary sekildi túrli beton buıymdary osy jerden shyǵarylýda.
- Jyl sońyna deıin 2 aýysymda jumys istedik. Qazir aýysymyna 35 adam jumys isteıdi. Ónimniń 3 túrin shyǵaryp jatyrmyz. Mysaly, jabyndy plıtalar 120 metrlik qos qalypta quıylyp, tapsyrys berýshiniń suranysyna saı kesiledi. Onyń eni - 120 sm, uzyndyǵy 6-8 metr. Keleshekte kásiporynda ónimniń birneshe túrin, atap aıtqanda, jylý oqshaýlaıtyn materıal salynǵan daıyn qabyrǵa, baspaldaq jáne baspaldaq alańy, kolonnalar sekildi ónimniń birneshe túrin shyǵarýdy josparlap otyrmyz. Bizdegi beton buıymdary naryqtaǵy baǵadan 10 paıyz jeńildikpen satylýda. Beton, temir buıymdarynyń sapasyn tekseretin zerthana da bar, - deıdi kásiporynnyń óndiris basshysy Qaırat Bekenov.
Kásiporyn tolyq qýattylyǵyna kóshken kezde munda baspaldaqtar, baspaldaq alańy men túrli uzyndyqtaǵy jabyndy plıtalar, jalpy turǵyn úı qurylysyna qatysty barlyq betonnan quıylǵan buıymdar shyǵarylady. Mamandar jergilikti beton buıymdaryn paıdalaný qazirgi salynyp jatqan qysh jobalardan arzanǵa túsetindigin aıtyp otyr.
Naqty kezeńde kásiporyn shıkizat bazasy retinde jergilikti kenishterdegi qum men úgindi tastardy paıdalanyp otyr. Tsement - Ońtústik Qazaqstan oblysynan, al temirler Reseıdiń Chelıabi qalasynan tapsyryspen alynady.
