Qyzylordanyń Qazaly aýdanynda 1,5 myń adamǵa jer telimi beriledi
Murat Ergeshbaevtyń aıtýynsha, aýdannyń ınjenerlik-ınfraqurylymyn damytý máselesi - basty nazarda. Sebebi, jer kezeginde turǵan turyndar sany jyl ótken saıyn kóbeıip keledi. Ótken jyly ınfraqurylymmen qamtamasyz etilgen ýchaskelerden 800 adamǵa jer berildi.
«Qazir Qazaly qalasy men Áıteke bı kentiniń aralyǵynda jumystar atqarylyp jatyr. Eki ortadaǵy 441 gekter jer ýchaskesine elektr jelileri, aýyz sý men gaz aparý úshin 3,2 mlrd teńge qarjy bólinip, tıisti jumystar jasaldy. Bıyl bul jumystar jalǵasady. Osy sharýalar aıaqtalǵan kezde biz eki aralyqtan 1500 adamǵa turǵyn úı salý úshin jer ýchaskesin beretin bolamyz», - dedi aýdan ákimi.
Aıta ketken jón, bıyl osy aımaqtan «Rámizder alańy» salynyp, Áıteke bıdiń eńseli eskertkishi ornatyldy.
«Jańa úlgidegi kásipkerlik nysandaryn salý úshin de jer ýchaskesi belgilenip, oǵan 24 kásipkerlik obektisin salý josparlanyp otyr. Sondaı-aq, balalarǵa arnalǵan oıyn-saýyq alańyn salý úshin de jeri belgilendi», - dedi Murat Nálhojauly.
Budan bólek, ol birneshe áleýmettik nysan salý da bas josparǵa engizilgenin aıtty. Atap ótsek, balabaqsha men birneshe mekemeniń ákimshilik ǵımarattaryn salý úshin jerleri belgilenip, jobalary ázirlenýde.
«Amandyq bolsa, osylaısha eki aralyqty qosyp, 50 myń halyq turatyn - úlken qalaǵa aınaldyrsaq degen oıymyz bar», - deıdi Murat Ergeshbaev.
