Qyzylordanyń «Qaısary» Premer-lıgaǵa joldama alatyn shaq jaqyn
QYZYLORDA. 29 qyrkúıek. QazAqparat - Budan buryn habarlanǵanyndaı, fýtboldan Qazaqstan chempıonaty birinshi lıgasynyń 31-týrynda Qaraǵandyda jergilikti «Gefest» komandasymen kezdesip, ony 6:0 degen iri eseppen utyp shyqqan Qyzylordanyń «Qaısar» klýby fýtbolshylarynyń Premer-lıgaǵa joldama alatyn shaǵy tym qashyq emes. Bul týraly komandanyń baspasóz hatshysy málim etti.
«Endigi jerde komandaǵa aldaǵy qalǵan 5 oıynda 10 upaı jınasa jetip jatyr. Komanda osy oıyndardyń 2-in óz alańynda, qalǵan 3-in syrt jaqtarda ótkizedi. Biraq olarda negizinen aýtsaıderlermen kúsh synasatynyn eskersek, alǵa qoıǵan mindettiń bıiginen tabylýǵa bolatynyna tolyq senim bar», - dedi baspasóz qyzmetindegiler.
Chempıonattyń kelesi týry oıynyn «Qaısar» 1 qazan, seısenbi kúni Astanada kósh sońyndaǵy komandalardyń biri - «Astana-1964» komandasymen ótkizedi. Qazir 67 upaımen týrnır kestesinde birinshi bolyp kele jatqan qyzylordalyqtar ózinen keıinge «Kaspııden» - 6, «Іle-Sáýletten» 8 upaı alda tur.
Endi ótken týrdaǵy ózge oıyndardyń nátıjelerimen tanys bolyńyzdar: «Іle-Sáýlet» (Ótegen batyr) - BIІK (Shymkent) 6:0, «Qyzyljar» (Petropavl) - «Maqtaaaral» (Jetisaı) 2:3, «Astana-1964» (Astana) - «Kaspıı» (Aqtaý) 0:2, «Ekibastuz» (Ekibastuz) - «Báıterek» (Astana) 2:0, «Spartak» (Semeı) - «Bolat-AMT» (Temirtaý) 2:0, «Oqjetpes» (Kókshetaý) - «Qyran» (Shymkent) 1:0, TsSKA (Almaty) - «Lashyn» (Qarataý) 1:1.
Birinshilik 26 qazanda kómbege jetedi.
