Qyzylordanyń «Qaısary» birden 17 fýtbolshymen kelisimshart jasady
QYZYLORDA. QazAqparat - Qyzylordanyń «Qaısar» fýtbol klýbynyń quramy jańa eki oıynshymen tolyqty. Elimizge belgili Marat Haırýllın men Ivan Sadovnıchıı aldaǵy maýsymda qyzylordalyq klýbtyń jeıdesin kıetin boldy, dep habarlaıdy QazAqparat tilshisi.
Marat Haırýllın 1984 jyldyń 26 sáýirinde dúnıege kelgen. Ol - Qazandyq «Rýbın» fýtbol klýbynyń túlegi.
Jasyl alańda jartylaı qorǵaýshy mindetin atqaratyn ol 2002 jyly «Rýbın 2» komandasynda fýtbolshy ómirin bastasa, 2007 jyly «Aqtóbe» komandasyna keldi. Al 2010 jyly Reseıdiń «Volga» klýbyna aýysqanymen, sol jyly «Aqtóbe» sapyna oraldy. Onda bes jyl boıy oınap, 2016 jyly Kókshetaýdyń «Oqjetpes» klýby quramyn tolyqtyrdy. Al 2017 jyldan beri «Atyraý» komandasy namysyn qorǵap keldi. Elimizdiń ulttyq qurama sapynda 13 oıyn ótkizgen.
Al Ivan Sadovnıchıı 1987 jyly 11 mamyrda Belarýstiń Grodno qalasynda dúnıege kelgen. Fýtbolshy mansabyn 2005 jyly Grodnonyń «Neman» klýbynda bastaǵan. Odan keıin 2007-2010 jyldarda «Dınamo-Belkard», «Belkard» komandalarynda oınaǵan. Al 2011 jyly «Vıtebsk» komandasyna aýysty. 2013 jyly qaıtadan «Neman» komandasyna keldi. 2014-2016 jyldarda Qostanaıdyń «Tobyl», Qaraǵandynyń «Shahter» komandalarynda oınady. Byltyr Taldyqorǵannyń «Jetisý» komandasy jeıdesin kıdi.
«Qaısar» basshylyǵynyń habarlaýynsha, ótken jyly komandada oınaǵan qaqpashylar - Aleksandr Grıgorenko, Marsel Islamkulov, Nurymjan Salaıdın, qorǵaýshylar - Ivan Graf, Abdel Azız Lamanj, Іlııas Ámirseıitov, Valentın Chýreev, Aleksandr Marochkın, jartylaı qorǵaýshylar - Maksat Baıjanov, Ashat Taǵybergen, Dýman Nárzildaev, Mark Gýrman, shabýylshylar - Bratıslav Pýnoshevats jáne Igor Zenkovıchpen kelisimshartty uzartqan. Sondaı-aq, olardyń qataryna Qyzylorda fýtbolynyń túlegi, shabýylshy Órken Mahan da qosyldy. Ol byltyr birinshi lıgada oınaıtyn Qyzylordanyń «Baıqońyr» komandasynda qarsylastar qaqpasyna toǵyz gol saldy.
Budan buryn «Qaısar» komandasy jańa maýsymǵa daıyndyǵyn bastaǵanyn habarlandy.
Sondaı-aq, «Qaısar» komandasynyń bas bapkeri Stoıcho Mladenov bıyl da qyzmetin jalǵastyratyn boldy. Qyzylordanyń «Qaısar» komandasy 2019 jyly júldeli orynnyń birine iligý maqsatyn kózdep otyr.
