Qyzylordanyń qarbyzy Reseıge eksporttalatyn boldy
QYZYLORDA. QazAqparat - Qyzylorda oblysynyń Jańaqorǵan aýdanyna qarasty Jaıylma eldi mekeninde 500 gektar jerge baqsha ónimderin otyrǵyzyldy, dep habarlaıdy QazAqparat.
Atalǵan aımaqta qazir 10 myń tonnadan astam ónim jınaý kózdelip otyr. Onyn teń jartysy shetelge eksporttalsa, qalǵany soltústik oblystarǵa jóneltiletin bolady. Sondaı-aq, Qyzylorda qalasyna da tasymaldanyp, shahar ortalyǵynan arnaıy saýda núktelerin ashý qolǵa alyndy.
Jalpy, Jaıylma eldi mekeni jarnamany qajet etpeıtin aýyl. Mundaǵy jurt erteden qarbyz egý sharýashylyǵymen aınalysady. Sáıkesinshe dámi til úıirer ónim - aýyldyń brendine aınalǵan desek bolady. Tań atqannan kesh batqanǵa deıin egis alqabynda ter tógip, Jer Anadan yrzyq nesibesin alatyn sharýalardyń búginde kóńilderi kóterińki. Bıyldan bastap ala jazdaı tókken ter esh ketpeı, pisken ónim kórshi Reseı eline eksporttalatyn boldy.
Sharýalar bıyl aýa - raıynyń qolaısyzdyǵy qarbyzdyń erte pisýine kedergi keltirgenin aıtady. Soǵan qaramastan shyǵym ótken jyldarmen salystyrǵanda áldeqaıda joǵary bolyp tur.
«Sońǵy 5-6 jyldan beri osy qarbyz egýmen aınalysyp kele jatyrmyz. Otbasymyzben ala jazdaı egis alqabynda ter tógemiz. Eńbegimiz esh ketip jatqan joq. Jaz bıyl jyldaǵydan salqyndaý boldy. Biraq, nátıje kóńilden shyǵyp tur. Qarbyz egýdiń bıyl ózgeshe tehnologııasyn paıdalandyq. Synama retinde, 1 gektar jerge kóshettep otyrǵyzyp kórgen edik. Maqsatymyzǵa jettik», - deıdi sharýa Samat Ospanov.
Jaıylma qarbyzy - taza tabıǵı ónim bolyp sanalady. ıAǵnı, ony ósirýde arnaıy hımııalyq dári -dármekter paıdalanylmaıdy. Sonyń arqasynda, munda pisken qarbyzdyń dámi de til úıiredi. Shyryndy daqyldy kútip - baptaýdyń ózindik erekshelikterin jergilikti turǵyndar óte jaqsy meńgergen. Aýyldaǵy baqsha egistikteri Qarataý eteginde ornalasqan «Jıdeli» sý qoımasy arqyly sýarylady.
Dıqandardyń mol ónim jınap, joǵarǵy kórsetkishke ıe bolýlaryna memlekettik baǵdarlamalardyń qosyp otyrǵan úlesi zor. Máselen, bıyl 11 sharýa oblystyq aýyl sharýashylyq qoldaý qory arqyly «Eginjaı» baǵdarlamasy aıasynda nesıege qol jetkizgen. Nátıjesinde egistikke qajetti tehnıkalaryn jańartyp, qosymsha shyǵyndaryna jumsaǵan.
«Jaıylma eldi mekeniniń sharýalaryna memlekettik tarapynan qoldaý qajet. Aýyl sharýashylyǵynyń damytý arqyly ǵana aýyldy gúldendirýge bolatynyn túsinemiz. Osy rette, ónimniń eksportqa shyǵarylýy dıqandarǵa kóp septigin tıgizgeli otyr. Jergilikti qarbyzdyń baǵasy qaltaǵa qonymdy, sapasy da ózge óńirlerden tasymaldanyp jatqan daqyldarǵa qaraǵanda jaqsyraq. Soltústik aýdandardan suranys óte joǵary. Reseıdiń Chelıabınsk qalasyna tasymaldanatyn bolady. Oblys ortalyǵynda tek Jaıylma qarbyzdaryn satatyn núkteler ashylmaq», - dedi Jańaqorǵan aýdanynyń ákimi Ǵalym Ámireev.
Jasyratyny joq, osy ýaqytqa deıin Jaıylma turǵyndary pisken ónimdi qaıda ótkizetinderin bilmeı, qınalatyn. Tipti, baqsha daqyldarynyń buzylyp, sharýalardy mol shyǵynǵy ushyratqan jaǵdaılar da kezdesti. Bul ózekti máseleniń bıyl sheshimin tapqanyna dıqandar dán rıza.
