Qyzylordanyń qamysy Germanııaǵa eksporttala bastady

QYZYLORDA. QazAqparat - Qyzylorda oblysynda jergilikti aımaqta ósetin qamys bıyl Germanııaǵa eksportqa shyǵaryla bastady, dep habarlaıdy QazAqparat tilshisi.

Oblystyq aýyl sharýashylyǵy basqarmasynyń habarlaýynsha, atalǵan memlekette qamys úılerdiń shatyryna arnalǵan toqyma sebetin jasaýǵa paıdalanylady. Bul ónim bıyl alǵash ret eksportqa shyǵarylǵan. Búgingi kúnge deıin 122,1 tonna Germanııaǵa jiberilgen.

Astyq tuqymdasyna jatatyn kópjyldyq shóptesin ósimdik - qamys jer sharynda keńinen taralǵan. Tek Arktıka men Antarktıdada kezdespeıdi. Qazaqstanda jerasty sýy jer betine jaqyn jatqan shalǵyndy, qumdy, sortań jerlerde ósetin 2 túri bar. Eń jıi kezdesetini - kádimgi qamys nemese quraq. Qamystan sebet toqylady, qurylysta qoldanylady. Odan hımııalyq óńdeý jolymen shaıyr, metıl spırti, sirke qyshqyly, qaǵaz alynady.

«Qyzylorda oblysynan jyl basynan beri 13,9 mln dollardy quraıtyn 38,9 myń tonna aýyl sharýashylyǵy ónimderi eksporttaldy. Ol byltyrǵy jyldyń osy kezeńimen salystyrǵanda 116,7 paıyzǵa artty. Shetelden balyq, kúrish, bıdaı qaldyǵy, qamys ónimderine suranys jasaldy. Oblysta óndiriletin ónimder Reseı, Qyrǵyzstan, Belarýs, Ázerbaıjan, Mońǵolııa, Tájikstan, Ýkraına, Túrikmenstan, Ózbekstan, Grýzııa, Qytaı, Polsha, Germanııa, Lıtva jáne Irak memleketterine jóneltilýde», - dep málim etti Qyzylorda oblystyq aýyl sharýashylyǵy basqarmasy.

Budan buryn Syr óńirindegi «Ár otbasy múshesi úshin úsh taldan egý» aktsııasy nátıjesin berip jatqanyn habarlaǵan edik.