Qyzylordanyń iri eki stadıonynda fýtbol matchtaryn ótkizýge tyıym salyndy
QYZYLORDA. QazAqparat- Búgin Óńirlik kommýnıkatsııalar qyzmetinde ótken brıfıngte Qyzylorda oblystyq deneshynyqtyrý jáne sport basqarmasynyń bastyǵy, oblystyq fýtbol federatsııasynyń prezıdenti Sadyq Mustafaev BAQ ókilderine Qazaqstannyń kásibı fýtbol lıgasy júrgizgen tekseristerdiń nátıjesin aıtyp berdi.
Oǵan sáıkes, búginnen bastap Ǵ.Muratbaev atyndaǵy ortalyq stadıonnyń negizgi alańy men «Lokomotıv» stadıonynda QKFL aıasyndaǵy oıyndardy ótkizýge tyıym salynady. Onyń sebebi, alań sapasynyń tómendigi, dep habarlady QazAqparat HAA tilshisi.
Osyǵan oraı, QKFL qoıǵan talapqa sáıkes, «Qaısar» óz alańyndaǵy oıyndardy basqa qalalarda ótkizýi tıis.
Biraq, jergilikti jankúıerlerdiń jaıyn eskergen oblys basshylyǵy ortalyq stadıonnyń qosalqy alańyn jóndeý týraly sheshim qabyldady. Biraq onyń syıymdylyǵy 1,5 myń adamǵa laıyqtalǵan.
Osyǵan baılanysty ІІD Jergilikti polıtsııa qyzmeti bastyǵynyń orynbasary, polıtsııa polkovnıgi Qýanysh Shúkirov quqyq qorǵaýshylardyń match kezindegi basty mindeti jankúıerler qaýipsizdigin qorǵaý ekendigin atap ótti. Biraq, nebári myń jarym oryndyq alańǵa 7 myń jankúıer aǵylǵanda olardyń qaýipsizdigin qorǵaý ońaı bolmasy anyq. Demek, «Qaısarǵa» janashyr myńdaǵan janǵa oıyndy úıden tamashalaýǵa týra keledi. Máseleniń osy jaǵyn basa aıtqan Q. Shúkirov jergilikti «Qazaqstan-Qyzylorda» telearnasy komandanyń ózimizdegi oıynyn tikeleı efırde kórsetse degen oıyn jetkizdi.
Ǵanı Muratbaev atyndaǵy ortalyq stadıon dırektorynyń orynbasary Nurjan Mashaevtyń aıtýynsha, tabıǵı alańdy qaıta jóndeýge shamamen 150 mln. teńge bólinedi. Josparlanǵan jumystar der ýaqytynda bitse, shilde-tamyz aılarynda «Qaısar» qarsylastaryn jańa alańda qabyldaıdy. N. Mashaevtyń sózin jalǵastyrǵan basqarma bastyǵy jańa alań sapasy Almatydaǵy Ortalyq stadıon alańymen birdeı bolatynyn jetkizdi.
Brıfıngte «Qaısarǵa» qosymsha taǵy 63 mıllıon teńge bólinip otyrǵandyǵy aıtyldy. Fýtbolshylar aımaq basshylyǵy men jankúıerler tarapynan kórsetilip otyrǵan senimdi aqtaýǵa barynsha kúsh salady. Basty mindet chempıonat kestesinde 6-orynnan tómendemeý.
